هندي رسنیو د ګجرات په احمد اباد سیمه کې د پوهنتون په لیلیه کې د تراویح لمانځه پر مهال د "نامعلومو کسانو" له خوا پر بهرنیو زده کړیانو د ډلییز برید خبر ورکړ. د ټولنیزو رسنیو ځینو کارونکو لیکلي، چې دغه زده کړیالان د افغانستان، ازبکستان، افریقا او د منځنۍ اسیا له څخه هېوادونو دي.
د هندي رسنیو د راپورونو له مخې، دغه پېښه تېره شپه شوې چې له برید وروسته پنځه زده کړیان روغتون ته وړل شوي دي.
راپورونه زیاتوي، چې د لمونځ کوونکو زده کړیانو شمېر لس تر دولسو کسانو رسیږي.
په ټولنیزو رسنیو کې د پیښې بېلابېلې ویډیوګانې هم خپرې شوې دي.
په یوه ویډیو کې چې داسې ښکاري زده کړیال دی، وایي چې برید کوونکي د تیښتې په حال کې دي خو پولیس یې نه نیسي.
د راپورونو او ویډیو ګانو له مخې، برید کوونکو له ډبرو او لرګیو سره په دغو زده کړیانو برید کړی دی.
د دغه برید انځورونو په ټولنیزو رسنیو کې د هندي کاروونکو تر منځ پراخ غبرګونونه پارولي دي.
په ویډیوګانو کې د هندو ملي ګرایانو په ملاتړ شعارونه اورېدل کېږي.
د هند د مسلمانانو د سراسري مجلس مشر او د پارلمان غړی اسدالدین اویسي په خپله اېکس پاڼه لیکلی: «دا د شرم خبره ده کله چې ستاسو دیني او مذهبي شعارونه یوازې هغه وخت پورته کیږي کله چې مسلمانان په سوله ییز ډول خپلې دیني چارې پر مخ وړي. کله چې تاسو د مسلمانانو په لیدلو کې په ناڅرګنده توګه غوسه کیږئ. که دا د خلکو رادیکالیزه کېدل نه دي، نو بیا څه شی دي؟»
ګجرات د هند د لومړي وزیر نریندرا مودي او د دغه هېواد د کورنیو چارو وزیر امیت شاه اصلي ټاټوبی دی.
ښاغلي اویسي دې موضوع ته په اشارې سره پوښتلي دي، چې مودي او د کورنیو چارو وزیر به د بهرنیو زده کړیانو پر وړاندې د برید په موضوع کې مداخله وکړي؟
نوموړي لیکلي، چې د یادو چارواکو د غبرګون په تمه دی.
ټاکل شوې ده، چې د اپریل په ۱۹مه د هند ټولټاکنې پیل شي او د دې بهیر په درشل کې تل مذهبي ترینګلتیاوې زیاتیږي.
