د فلسطین په غزه کې د اسراییل په بریدونو کې د وژل شویو فلسطینیانو شمېر له ۳۲ زرو واوښت. د فلسطین د عامې روغتیا وزارت د معلوماتو له مخې، د اکټوبر له اوومې راهیسې د اسراییل په بریدونو کې ۳۲ زره ۷۰ فلسطینیان وژل شوي او تر ۷۴ زرو ډېر ټپیان دي.
د اسراییل په بریدونو کې په وژل شویو کسانو کې څه باندې ۱۳ زره ماشومان هم شامل دي.
د فلسطین د عامې روغتیا وزارت خبر ورکړی، چې په تېرو ۲۴ ساعتونو کې پر غزې د اسراییل په بریدونو کې ۸۲ کسان وژل شوي او ۱۱۰ نور ټپیان دي.
له بلې خوا د څو میاشتو په تېرېدو سره لا هم په غزه کې په زرګونه جسدونه تر خاورو لاندې پراته دي او د دې وېره هم شته، چې د اسراییل په بریدونو کې د وژل شویو کسانو اصلي شمېر تر دې هم زیات وي.
له بل پلوه روسيې او چين د ملګرو ملتونو په امنيت شورا کې د امريکا پرېکړه ليک رد کړ.
په غزه کې د اوربند په اړه د ملګرو ملتونو د امنیت شورا د جمعې په ورځ غونډه وکړه، چې د غزې د اوربند او د بندیانو د تبادلې په اړه د امریکا پر پرېکړه لیک رایه اچونه وکړي.
د امنیت شورا له ۱۵ غړو څخه ۱۱ یې ملاتړ کړی، په داسې حال کې چې روسیې، چین او الجزایر یې مخالفت کړی دی.
