د اېسنا خبري اژانس د راپور له مخې تر اوسه پورې د ایران په راسک او چابهار کې پر پوځي اډې بریدونو کې پنځه امنیتي عسکر وژل شوي او په جګړه اته بریدګر هم وژل شوي. اېسنا وايي، جګړه لا هم روانه ده او ښايي پاتې شپږ بریدګر هم ووژل یا ژوندي ونیول شي.
ایراني چارواکو د چهارشنبې په شپه په راسک او چابهار کې پر پوځي اډې د ډله ییزو وسله والو بریدونو خبر ورکړی.
تر دې وړاندې د سیستان او بلوچستان امنیتي چارواکو ویلي وو، د جیش العدل وسله والې ډلې له بریدګرو سره په نښته کې درې ایراني عسکر وژل شوي.
د ایراني رسنیو د راپورونو له مخې جګړه لا هم روانه ده او د زیانونو په شمېر کې وخت پر وخت بدلون راځي.
جیش العدل وسله والې ډلې د یوې خبرپاڼې په خپرولو سره د چابهار، راسک او سرباز په ښارونو کې د عملیاتو د پیل خبر ورکړی.
جیش العدل په خپل ټېلګرام او وېبپاڼه کې یو خبرتیا خپره کړې او له ملکي وګړو یې غوښتي، چې د روانو عملیاتو له سیمې لرې پاتې شي او خپلو کورونو ته ستانه شي.
د سیستان او بلوچستان د والي مرستیال علیرضا مرحمتي د چهارشنبې په شپه شاوخوا لس بجې د راسک او چابهار پر پوځي مرکزونو د ترهګریزو بریدونو خبر ورکړ او ویې ویل چې وضعیت تر کنټرول لاندې دی.
ایراني چارواکي وايي، وسله والو د چابهار ښار یو تن وګړی یرغمل نیولی او د یرغمل شویو د ژوند د ژغورلو لپاره د امنیتي ځواکونو عملیات په پوره دقت سره روان دی.
د ایران کورنیو چارو وزارت امنیتي مرستیال مجید میر احمدي ایسنا خبري اژانس سره په مرکه کې ویلي: «ټول ترهګر کلابند شوي، هغه وسله وال چې د ترهګرو ملاتړ یې کاوه تر مقاومت وروسته تښتېدلي دي، د وژل شویو ترهګرو شمېر اته تنه دی او لږ تر لږه شپږ نور به هم ووژل شي او یا ونیول شي.»
جیش العدل وسله والې ډلې له ډیرې مودې وروسته د دغو بریدونو په ترسره کولو سره وښوده چې دغه ډله لا هم فعاله ده او د لویو بریدونو وړتیا لري.
تر دې وړاندې د سوریې په پلازمېنه دمشق کې د ایران سفارت اړوند په کونسلګرۍ توغندیز برید شوی و او ایراني چارواکو یې د پړې ګوته اسراییل ته نیولې وه، پر ډیپلوماټیکه سیمه دغه برید په نړېواله کچه غندل شوی، د ملګرو ملتونو امنيت شورا هم په دې اړه بیړنۍ ناسته وکړه.
