ایراني چارواکو د چهارشنبې په شپه په راسک او چابهار کې پر پوځي اډې د ترسره شوي ترهګریز برید په اړه خبر ورکړ. د سیستان او بلوچستان امنیتي چارواکي وایي، د جیش العدل ډلې له بریدګرو سره په نښته کې درې ایراني ځواکونه وژل شوي دي. د راپورونو له مخې دا جګړه لا هم روانه ده.
ایران د کورنیو چارو وزارت امنیتي مرستیال مجید میر احمدي فارس خبري اژانس ته ویلي: « ترهګرو په راسک کې د سرحدي ګارډ د پولیسو په مرکز او د سپاه پاسداران پر مرکزي دفتر په ورته وخت کې بریدونه وکړل. پر دې سربېره، د مرستندویه ځواکونو د لېږلو په لاره کې یو کمین جوړ شوی؛ ترڅو د مرستې لپاره د سرتېرو د لېږلو مخه ونیسي.»
بل خوا د سیستان او بلوچستان د والي مرستیال علیرضا مرحمتي ویلي، چې په راسک او چابهار کې د پوځي مرکزونو درې امنیتي سرتېري وژل شوي دي.
د راپورونو له مخې جیش العدل ډلې د یوې خبرپاڼې په خپرولو سره د چابهار، راسک او سرباز په ښارونو کې د چاڼیزو عملیاتو د پیل خبر ورکړی دی.
جیش العدل په خپل ټېلګرام او وېبپاڼه کې یو خبرتیا خپره کړې او له ملکي وګړو یې غوښتي، چې د روانو عملیاتو له سیمې لرې پاتې شي او خپلو کورونو ته ستانه شي.
د ایران د کورنیو چارو د وزارت مرستیال ویلي:« په راسک کې د سپاه پاسداران د جنګیالیو د مقاومت په نتیجه کې ترهګر د سپاه پاسداران مرکز ته په ننوتلو بریالي نه شول او یو ترهګر هم ووژل شو او نښتې لا هم دوام لري. ترهګر ځواکونه هم کلابند شوي دي.»
مير احمدي د درياباني د قوماندانۍ د حالت په اړه هم وويل:« په چابهار کې نښتې دوام لري او په عزيز درياباني کې زموږ د جنګياليو او نورو ځواکونو په مقاومت سره يو ترهګر وژل شوى او څو تنه نور ټپيان شوي دي. په چابهار کې ترهګر تر محاصرې لاندې دي او نښتې دوام لري.»
د هغه په وينا، په دې جګړه کې د سپاه پاسداران دوه غړي او يو ايرانى پوليس وژل شوي دي.
