د ترکیې د اوشاک ښاروال اوزکان یلیم خبرداری ورکړی، که د افغانستان او سوریې اوسېدونکي وړه تېروتنه هم وکړي؛ نو هغوی به له دغه هېواده واېستل شي. د اردوغان د مخالف ګوند دغه غړي همداراز ویلي، چې دغو کډوالو ته د کار او سوداګرۍ جواز نه ورکوي.
ترکي رسنیو د پنجشنبې په ورځ د (وري ۱۶مه) د اوشاک د نوي ښاروال دغه څرګندونې خپرې کړې دي.
ښاغلی یلیم د ترکیې د خلق جمهوري غوښتونکي ګوند غړی دی، دغه ګوند د ترکیې په لویو ښارونو کې په وروستیو سیمهییزو ټاکنو کې زیاتې بریاوې ترلاسه کړې او د خپلو پلویانو په منځ کې یې د راتلونکو پارلماني او ولسمشریزو ټاکنو د ګټلو هیلې راوټوکولې.
یلیم ټینګار کړی، چې نور په اوشاک کې افغان او سوري کډوال نه غواړي او هغوی چې لا د مخه دلته مېشت دي ورته د کار او سوداکرۍ جواز نه ورکوي.
هغه له سپکاوي په ډکه ژبه وویل، که له دغو کډوالو وړه تېروتنه هم وشي، « له غوږونو به یې ونیسو او بهر به یې وغورځوو.»
ترکیې په وروستیو میاشتو کې په ځانګړې توګه د افغان کډوالو د نیولو لړۍ چټکه کړې ده.
د ترکیې د کورنیو چارو وزیر اعلان کړی، چې د ناقانونه کډوالو د پېژندلو او نیولو په موخه یې د ترکیې په بېلابېلو ښارونو کې د پلټنو پوستې جوړې کړې او ګرځنده ګزمې یې هم پیل کړې دي.
