د ملګرو ملتونو سرمنشي د حماس سره د اسراییل په جګړه کې د ۱۹۶ تنو مرستندویانو د وژلو په تړاو د بې پرې پلټنو غوښتنه کړې. د اسراییل په هوايي بریدونو کې د یوه امریکايي سازمان د مرستندویانو له وژلو او په غزه کې د انساني ناورین د رامنځته کېدو وروسته د نړۍوالو کرکه زیاته شوې ده.
اسراییلي پوځ د جمعې په ورځ اعلان وکړ، چې د یوه امریکايي مرستندویه بنسټ پر کارکوونکو شوی برید یوه تېروتنه وه.
انتونیو ګوترېش وویل: «اسراییلي دولت د خپلو تېروتنو منښته کړې؛ خو بنسټیزه ستونزه دا نه ده، چې چا دغه تېروتنه کړې، بلکې پوځي تګلارې شته چې د بیا، بیا دغسې تېروتنو اجازه ورکوي چې دغه تېروتنې څو برابره زیاتې شي.»
هغه پرته له دې چې د څېړونکې ډلې په اړه په روښانه ټکو څه ووایي زیاته یې کړه:« د دغو ماتو د لمنځه وړلو لپاره په سیمه کې د بې پرې او مانا لرونکو څېړنو جوتول اړین دي. ۱۹۶ تنه بشري مرسته رسونکي وژل شوي او موږ غواړو پوه شو، چې ولې هغوی ووژل شول؟»
د جمعې په ورځ د ملګرو ملتونو د امنیت شورا ۱۵ غړو په غزه کې د پېښېدونکې قحطۍ او پر مرستندویه کارکوونکو د شویو بریدونو په اړه غونډه وکړه.
په دغه سازمان کې د اسلوونیا استازي ساموېل زبوګر وویل: «که موږ د غزې په شمال کې سره خبرې کولې؛ نو موږ ۱۵ تنه د خوړو څخه بې برخې پاتې کېدو. زموږ له ډلې به ۱۰ تنو ډېرې شپې او ورځې بې خوړو تېرې کړې وای.»
د ملګرو ملتونو د مرسته رسولو جګپوړي مشر رامش راجاسېنګهام امنیت شورا ته د وینا پر مهال له ټولو هېوادونو غوښتنه وکړه، چې «له ډیپلوماټیکو او اقتصادي فشارونو او د جګړې د قوانینو سره سم دې د وسلو په صادرولو» د بشري قوانینو له سرغړونو په مخنیوي کې دې مرسته وکړي.
په غزه کې د خوراکي توکو کڅوړې له الوتکو څخه ځمکې ته راغورځول کېږي.
اسراییل د دغه هېواد په سویلي سیمو د اکټوبر په اوومه د حماس له مرګوني برید وروسته، په غزه کې ستر عملیات پيل کړل. په دغو عملیاتو کې تر اوسه له ۳۳ زرو څخه زیات کسان وژل شوي دي.
پر اسراییل د حماس په برید کې شاوخوا ۱۲۰۰ کسه وژل شوي او ۲۵۰ تنه نور یرغمل شوي دي.
