د موزمبیک د لېږد رالېږد یوه موسسه وایي، چې ددې هېواد د شمال په سواحلو کې یوې بېړۍ د چپه کېدو له امله د ښځو او ماشومانو په ګډون ۹۴ کسانو ژوند له لاسه ورکړ. پېښه هغه وخت رامنځته شوه، چې د وبا د خپرېدو له وېرې شاوخوا ۱۳۰ کسان په یوه بېړۍ کې د سیمې د پرېښودو په موخه سپاره شوي و.
د موزمبیک د لېږد رالېږد موسسې یو مدیر لورنکو ماچادو د دوشنبې په ورځ (د وري ۲۰مه) له رسنیو سره په خبرو کې ویلي، چې یاده بېړۍ د کب نیولو وه او د مسافرانو د لېږد جواز یې نه درلود.
د راپورونو له مخې، د بېړۍ ۲۶ سورلۍ تراوسه نادرکه دي.
یوه بل سیمه ییز چارواکي هم ویلي دي، چې د بېړۍ سورلۍ د وبا د خپرېدو له وېرې د تېښتې په حال کې و.
جیمي نتو ویلي دي، چې د پېښې ډیری قربانیان ماشومان دي.
موزمبیک او د افریقا د لویې وچې په سویل کې یو شمېر نور هېوادونه له یوه کال راهیسې د وبا له ناروغۍ سره مبارزه کوي.
د یونېسف د راپور پر بنسټ، د ۲۰۲۳ کال له اکټوبر میاشتې راهیسې په موزمبیک کې په وبا ناروغۍ ۱۳ زره پېښې ثبت شوي دي.
راپور دغه راز زیاته کړې، چې په یاد شمېر کسانو کې ۳۰ کسانو بیا ژوند هم له لاسه ورکړی دی.
