د لبنان د حزب الله ډلې مشر په دمشق کې د ایران پر کونسلګرۍ اسراییل ته منسوب شوی هوايي برید «ځواب ورکونکې تېروتنه» بللې او ویلي یې دي چې ایران به د دغه برید ځواب ورکړي. حسن نصرالله وویل چې امریکا او اسراییل پوهېږي چې د ایران غبرګون را روان دی.
نصرالله یادونه وکړه چې دا برید په «سوریه کې په وروستیو کلونو کې د اسراییل تر ټولو لوی برید دی.» هغه ویلي دي چې د ایران او اسراییل ترمنځ په بشپړه توګه جګړه نه کیږي خو ایران به د دغه برید مستقیم ځواب ورکړي.
هغه وویل چې په دې ډیپلوماټیک ځای باندې په برید سره اسراییل لومړی خو د ایران خاوره په نښه کړه او دویم یې د دغه هیواد یو لوړپوړی چارواکی «وواژه».
نصرالله ادعا وکړه چې د ایران د سپاه پاسداران کوم قوماندانان چې د اسراییل په برید کې وژل شوي یوازې «مشاوران» وو چې په سوریه کې د لارښوونې او لوژیستیکي ملاتړ لپاره هلته وو.
اسراییل د سپاه پاسداران غړي تورن کړي چې د خپلو نیابتي ډلو له لارې د اسراییل پر ګټو او خاورې په بریدونو کې رول لري.
محمد رضا زاهدي او د سپاه پاسداران شپږ نور غړي د تېرې دوشنبې په ورځ په دمشق کې په یوه هوايي برید کې ووژل شول. له یوې اونۍ راهیسې، د ایران مشرانو په وار، وار ګواښ کړی چې د هوایي برید ځواب به ورکړي.
امریکايي رسنیو ویلي چې امریکا او اسراییل استخباراتي مالومات ښيي چې ایران په مستقیم ډول د توغندیو او بې پیلوټه الوتکو په وسیله اسراییل په نښه کولای شي. اسراییل ويلي چې هر ډول سناریو ته چمتو دي.
خو یو شمیر چارواکو او ایران ته نږدې رسنیو ویلي چې پر غچ اخیستنې ټینګار او داسې ځواب چې له اسراییل سره د مخامخ جګړې لامل شي، د ایران په ګټه نه دی.
د ایران د بهرنیو چارو وزیر هم د دوشنبې په ورځ دمشق ته د خپل سفر په ترڅ کې ادعا وکړه چې امریکا اسراییل ته د ایران پر کونسلګرۍ د برید لپاره «شین څراغ» ورکړی و.
حسین امیر عبداللهیان زیاته کړه چې پر کونسلګرۍ برید د امریکايي الوتکو او توغندیو په کارولو سره شوی او امریکا یې باید مسوولیت منونکې و اوسي.
امریکا په دغه برید کې لاس لرل رد کړي دي.
