د اسټرالیا د بهرنیو چارو وزارت له خپلو وګړو غوښتي، چې په افغانستان کې د ترهکریزو او سړي تښتونو د جدي ګواښونو له امله دې دغه هېواد ته سفر ونه کړي. دغه وزارت خبرداری ورکړ، چې په افغانستان په ځانګړې توګه په کابل کې د امنیتي ګواښونو کچه ډېره زیاته ده.
د اسټرالیا د بهرنیو چارو وزارت د ۱۴۰۲ کال د لیندۍ په میاشت کې هم خپلو وګړو ته لارښوونه کړې وه، چې د امنیتي ګواښونو له امله افغانستان ته سفر و نه کړي.
دغه وزارت د چهارشنبې په ورځ د یوې خبرپاڼې په خپرولو سره د افغانستان د وضعیت په اړه لیکلي: «ترهګر په افغانستان کې بهرنیان، غیر دولتي ادارې او بشردوستانه عملیات په نښه کوي.»
د یاد وزارت خبرپاڼه همداراز خبرداری ورکوي، چې د اسټرالیایي وګړو په ګډون بهرنيان په افغانستان کې د تښتونې یا نیول کېدو له جدي ګواښ سره مخ دي.
د اسټرالیا د بهرنیو چارو وزارت ټینګار کړی، چې اوسمهال په افغانستان کې هیڅ کوم اسټرالیايي چارواکی حضور نه لري او په افغانستان کې د اسټرالیایي وګړو لپاره د قونسلګرۍ د خدمتونو د وړاندې کولو وړتیا په جدي توګه محدوده شوې ده.
اسټرالیا تر دې مخکې ویلي وو، چې په افغانستان کې هوايي ډګرونه او عامه ځایونه د ترهګریزو بریدونو له اهدافو څخه دي.
