د روسیې ولسمشر وايي، په دغه هېواد کې اسلامي سازمانونه په مهمو ملتپالو، خیریه او روزنیزو هڅو سره په روسۍ ټولنه کې فعال رول لري. ولادیمیر پوتین د روسیې مسلمانان د روسۍ ټولنې د وحدت په پیاوړتیا او د قومونو ترمنځ په همغږۍ ساتلو کې اغېزناک بللي.
ښاغلي پوتین دا خبره، نن دغه هېواد مسلمانانو ته د اختر د مبارکۍ پیغام کې کړې ده.
د روسیې د بهرنیو چارو وزارت نن په خبرپاڼه کې د ښاغلي پوتین له قوله ویلي، چې په روسیه کې مسلمانان تاریخي، کلتوري او مذهبي دودونه په درناوي سره لمانځي او دوی د ټولنې او کورنیو په توګه د اختر د لمانځلو لپاره سره راټولیږي او د خپلو نیکونو د میراث ساتلو لپاره له اړمنو سره مرسته کوي.
پوتین په داسې حال کې د روسیې مسلمانانو ته د اختر مبارکي ورکړه، چې تېره میاشت د مسکو په څنډه کې کې د موسیقۍ د کنسرت په یوه سالون کې وسله وال برید وشو چې ۱۳۷ تنه په کې ووژل او ۱۸۲ نور ژوبل شول.
دا په تېرو دوو لسیزو کې په روسیه کې تر ټولو خونړی برید بلل کېږي، چې داعش یې پړه منلې ده.
