د اسیا پراختیایي بانک د اسیا اقتصادي حالت ته د کتنې کلني راپور په خپرولو سره ویلي، چې سږکال به په پاکستان کې ګراني ۲۵ سلنې ته ورسېږي. د دې راپور پر بنسټ، د پاکستان اقتصاد د سیاسي بې ثباتۍ او سیلابونو له امله راښکته شوی دی.
په راپور کې دغه راز زیاته شوې ده، چې په روان مالي کال کې د پاکستان اقتصادي وده ۱،۹ سلنه اټکل شوې او سياسي بې ثباتي د اقتصادي رغېدو او اصلاحاتو پر وړاندې لويه ننګونه بلل شوې ده.
د اسیا پراختیايي بانک د راپور په یوه برخه کې راغلي، چې د کرنې، تولید او صنعتي سکټور په روان مالي کال کې د ښه والي تمه لري، په داسې حال کې چې د ودانیز سکټور وده د لګښتونو او د مالیاتو د زیاتوالي له امله اغیزمنه شوې ده.
د راپور له مخې، د پاکستان د راتلونکي مالي کال اقتصادي وده ۲،۸ سلنه اټکل شوې ده، چې له امله به یې ګراني کمه شي.
دا په داسې حال کې ده، چې په همدې راپور کې بیا د چین اقتصادي وده ۴،۸ سلنه او د هند اقتصادي وده ۷ سلنه ښودل شوې ده.
تېر کال نړیوال بانک هم په یوه راپور کې ویلي و، چې په ۲۰۲۳ او ۲۰۲۴ کلونو کې به د پاکستان د بودیجې کسر په لوړه کچه کې پاتې شي.
