د اسیا پراختیايي بانک د پنجشنبې په ورځ په خپل وروستي اقتصادي راپور کې ویلي، چې په روان مالي کال کې به د پاکستان اقتصاد ۱.۹ سلنه وده وکړي او ورسره خبرداری یې ورکړی، چې انفلاسیون به په همدې موده کې ۲۵ سلنه لوړ پاتې شي.
پاکستان په وروستیو کلونو کې د پام وړ اقتصادي ننګونو لکه د لوړ انفلاسیون، مالي کسر او د بهرنیو پورونو له فشارونو سره مخ دی.
تېر کال پاکستان د خپل اقتصاد د ټیکاو لپاره د پیسو نړۍوال وجهي صندوق (ای اېم اېف) څخه د درې ملیارد ډالرو لنډمهاله پور ترلاسه کړ، چې په راتلونکو ورځو کې یې د پرې کولو تمه کېږي.
د اسیا پراختیایي بانک ویلي، وړاندوینه شوې چې دغه وده به په راتلونکي مالي کال کې ۲.۸ سلنې ته لوړه شي.
