فرانسوي چارواکو اعلان کړی، یو ۲۵کلن افغان کډوال د کوچني اختر پر ورځ د دغه هېواد په بوردوي ښار کې د شرابو د څښلو له امله یو کس د چړې پر مټ وژلی او یو بل یې ټپي کړی دی. دغه افغان کډوال له دغه برید وروسته، د پولیسو لهخوا په ډزو وژل شوی دی.
د فرانسې پولیسو د چهارشنبې په ورځ د اختر په لومړۍ ورځ اعلان وکړ، چې یوه بریدګر د بوردوي ښار د ګارون سېند ته څېرمه یو کس د چړې په ګوزارونو وژلی او یو بل یې ټپي کړی دی.
د بوردوي عمومي څارنوال فردریک پورترې وویل، چې دغه بریدګر افغان کډوال و.
هغه خبریالانو ته ویلي، چې دغه کډوال د اختر پر ورځ د شرابو د څښلو له امله دوه کسه رټلي او پر چړې یې پرې ګوزارونه کړي دي.
له دغه برید وروسته بریدګر د پولیسو لهخوا په ډزو ووژل شو.
فرانسوي چارواکو ویلي، چې د دغې پېښې قربانیان دوه ۲۶کلن او ۳۷ کلن الجزایري ځوانان وو.
د بوردوي څارنوال ویلي، دغه افغان کډوال د ۲۰۲۱کال په سپټمبر میاشت کې د پناه غوښتنې اسناد ترلاسه کړي وو.
هغه ویلي، داسې هیڅ کوم ثبوت نه شته چې ثابته کړي دغه برید دې یو ترهګریز برید وي.
