د استرالیا پولیسو د سیډني په کلیسا کې د چاقو برید «ترهګريز» بللی او ویلي یې دي چې انګېزه یې ښايي د «مذهبي افراطیت» له امله وي. په سیډني کې د دوشنبې ورځې په برید کې د یوه پادري په ګډون لږ تر لږه څلور کسان ټپیان شوي چې په تړاو یې یو تنکی ځوان نیول شوی دی.
دغه برید په «اسوری کلیسا» کې د روانو مراسمو پر مهال وشو.
له برید وروسته د اسټرالیا د پادري قهرجن ملاتړي له کلیسا بهر راټول شول او د بریدګر د نیولو غوښتنه یې وکړه.
پولیسو د هغه بریدګر د خوندیتوب په اړه د اندېښنې له امله چې د برید په ځای کې نیول شوی و د یو څه وخت لپاره په کلیسا کې ساتلی و.
د پولیسو چارواکو دا هم ویلي چې د دوی د څېړنو د لومړي بهیر له مخې څرګندیږي چې برید کوونکي په یوازې سر دا کار کړی دی.
په برید کې ټپي شوي پادری مار ماری ایمانویل خبرې په یوټیوب او ټیک ټاک کې په زرګونو لیدونکي لري. هغه د کرونا وبا پر مهال ځکه شهرت ترلاسه کړ کله چې هغه قرنطین د «ډله ییزې غلامۍ» په توګه و نوماوه.
دا په دریو ورځو کې د استرالیا په تر ټولو ګڼ مېشته ښار کې د چاقو دویم برید و. د شنبې په ورځ په یوه سوداګریز مرکز کې په لومړي برید کې شپږ کسان ووژل شول او ۱۲ نور ټپیان شول.
