د ایران د خراسان رضوي د کار او ټولنیزو چارو عمومي مدیر محمد امین بابایي وایي، چې ۹۰ سلنه افغانان غواړي په دې ولایت کې د اوسېدو قانوني اسناد ولري. د نوموړي په وینا، له هغو افغانانو چې په دې ولایت کې قانوني پاتې کېدل غواړي تر لس سلنه کم یې سوداګر دي.
دغه ایراني چارواکي خبرداری ورکړی، ترڅو چې د افغانانو د کار جواز تمدید نشي په دې ولایت کې یې اوسېدل غیرقانوني دی
د ښاغلي بابایي په خبره، د سوداګرو د کار جواز د نوي کولو لپاره په ايران کې د هغوی د کاروبار د ثابتولو لپاره کافي اسنادونو ته اړتيا ده.
د ایراني رسنیو د راپور له مخې، ښاغلي بابایي د یوې غونډې په ترڅ کې زیاته کړې ده، چې که د ایران او افغانستان د سوداګرۍ ګډه خونه په دې ولایت کې د افغان سوداګرو نوملړ د خراسان رضوي د تعاون، کار او ټولنیزو چارو ادارې ته ورکړي، د هغوی د اوسېدو او د کار د جواز چارې به اسانه شي.
پر افغانستان د طالبانو له بیا واکمنېدو وروسته ډېر شمېر افغانان د ایران په ګډون د سیمې هېوادونو ته ولاړل.
د راپورونو پربنسټ، ډېر شمېر افغانان د قانوني اوسېدو، د کار د جواز او ویزو د نوي کولو په برخو کې له ستونزو سره مخ دي.
