په بېلابېلو سیمو کې له شخړو سره - سره په پاکستان کې د قومي او صوبايي اسمبلۍ په ۲۱ حوزو کې د ضمني ټاکنو لپاره د رایې اچونې وخت پای ته ورسېد او اوس د ابتدايي پایلو لپاره د رایو د شمېرنې پروسه پیل شوې ده.
د رایه ورکونې پر مهال د پنجاب په یو شمېر سیمو کې د سیاسي ګوندونو د کارکونکو ترمنځ د نښتو راپورونه هم ورکړل شوي دي.
د صوبايي اسمبلۍ په ۱۳۹مه حوزه شیخوپوره کې د رایه ورکونې په یوه مرکز کې د سني اتحاد کونسل او مسلم لیګ (ن) د کارکوونکو تر منځ نښته شوې، مخالفو سیاسي ډلو پر یو بل ډزې کړي او درې تنه ټپیان دي.
پوليس وايي، چې د نظام پورډاکا کلي د هلکانو عالي لېسې د رایه اچونې مرکز مخې ته شخړه رامنځته شوې، دغه شخړه د انتخاباتي کمپ د موقعيت له امله شوې، چې دوه کسان يې نيولي دي، له نښتې وروسته د رایه اچونې مرکز بېرته پيل شوی و.
بلخوا په این ای ۱۹۹یمه حوزه کې د سني اتحاد کونسل او مسلم لیگ (ن) د کارکوونکو تر منځ بله نښته شوې، نښته د لاهور کالج د رایه اچونې په مرکز کې شوې ده.
بل اړخ ته په نارووال کې هم د سني اتحاد کونسل او مسلم ليګ (ن) کارکوونکو تر منځ شخړه شوې ده، چې پکې د مسلم ليګ ن یو غړی محمد يوسف په ډزو کې وژل شوی دی.
د پاکستان په کومو حوزو کې ضمني انتخابات کیږي؟
په دغو ضمني ټاکنو کې دوه حوزې په پنجاب کې دوه په خېبر پښتونخوا کې او یوه ټاکنیزه حوزه په سند کې موجوده ده.
همداراز د صوبايي اسمبلۍ لپاره ۱۲ حوزې په پنجاب کې، دوه په بلوچستان کې او دوه حوزې په خېبر پښتونخوا کې د ضمني ټاکنو غړې حوزې دي.
د یادونې وړ ده، چې د امنیتي اندېښنو له امله په ځینو ټاکنیزو حوزو کې د موبایل خدمات هم درول شوي وو.
