له ایران څخه ۸۵ کسان د عمرې د مراسمو د ترسره کولو په موخه سعودي عربستان ته ولاړل. دا له ۹ کلونو وروسته لومړی ځل دی، چې ایراني چارواکي اجازه ورکوي؛ څو د دې مذهبي مراسمو لپاره متقاضیان سعودي عربستان ته واستوي.
د ایران رسمي خبري اژانس راپور ورکړی، چې یاد شمېر کسان د دوشنبې په ورځ (د غویي ۳یمه) د حج او زیارت په چارو کې د علي خامنه یي د استازي او په ایران کې د سعودي عربستان د سفیر عبدالله بن سعود العنزي په حضور سره د خمیني له هوایي ډګر څخه ولاړل.
رویټرز خبري اژانس لیکلي، چې دا سفر د منځنۍ ختیځ د دوو قدرتونو د اړیکو د ښه کېدو په پایله کې شوی دی.
تهران او ریاض د اړیکو له پرې کېدو اووه کاله وروسته د ۱۴۰۱ کال د کب په میاشت کې د ډېپلوماتیکو اړیکو د بیا پیل لپاره هوکړې ته رسېدلي وو.
دغه هوکړه د چین په منځګړیتوب او بیجینګ ته د ایران د اسلامي جمهوریت د ملي امنیت د عالي شورا د پخواني منشي علي شمخاني د سفر پرمهال وشوه او ترهغه وروسته بیا سعودي عربستان ته د ایران ولسمشر ابراهیم رییسي سفر وکړ.
د ایران هما هوايي شرکت د دوشنبې په ورځ د عمرې لپاره د ایراني حاجیانو د لېږلو په اړه اعلان وکړ، چې هره ورځ به د ۲۶۰ کسانو په ظرفیت دوه الوتنې د ایران له بېلابېلو ښارونو څخه سعودي عربستان ته او برعکس یې ترسره شي.
ددې راپور له مخې؛ الوتنې د دوشنبې په ورځ پیل شوي او د غویي میاشتې تر ۲۳مې پورې به دوام وکړي.
