د ایران بهرنیو چارو وزیر د اروپايي ټولنې د غړو هیوادونو د هغې هوکړې په غبرګون کې چې دغه هيوادونه دې پر ایران بندیزونه لا زیات کړي، ويلي چې بندیزونه دې د ایران په ځای پر اسراییل ولګول شي. هغه ويلي، پر اسراییل د ایران له لوري برید د ایران د دفاع لپاره شوی.
امیر عبداللهیان وايي، د اسراییل پر وړاندې د ایران د مشروع دفاع له کبله، اروپايي ټولنې په بېړه پر ایران د لا زیاتو ناقانونه بندیزونو لګولو پرېکړه کوي.
د اروپايي ټولنې د غړو هېوادونو د بهرنیو چارو وزیران تېره ورځ دوشنبه په لوګزامبرګ کې سره راټول شوي و؛ چې پر اسراییل د سپاه پاسداران د بې سارې برید په غبرګون کې پر ایران د نویو بندیزونو د لګولو پلان جوړ کړي.
د ایران بهرنیو چارو وزیر امیر عبداللهیان نن سه شنبه د (غوايي څلورمه) په خپله ایکس پاڼه له اروپايي ټولنې غوښتي چې د اسرایيل د خوشحالولو لپاره د امریکا سپارښتنو ته غوږ و نه نیسي او په مسوولانه ډول باید دغه بندیزونه پر اسراييل ولګوي.
د اروپایي اتحادیې د بهرني سیاست مسوول جوزپ بورل د دوشنبې په ورځ (د غویي درېیمه) وویل، چې د دغې اتحادیې غړو د ایران د بې پیلوټه الوتکو او توغندیو د پروګرامونو پر وړاندې د بندیزونو د پراخولو او دغه راز د تهران نیابتي ځواکونو ته د هغوی د سپارلو په اړه هوکړه وکړه.
بورل له دغې ناستې وروسته وویل، چې د دې اتحادیې غړو هوکړه وکړه، چې د ایران د بې پیلوټه الوتکو په وړاندې شته بندیزونه پراخ کړي؛ چې توغندي او د وسله والو ډلو او نورو هیوادونو لکه روسیې ته یې د احتمالي لیږد مخه ونیول شي.
که څه هم د ایران سپاه پاسداران د امریکا د بهرنیو چارو وزارت د ترهګرو په نوملړ کې شامل دی، خو یو شمېر هېوادونه غواړي چې ټول اروپایي هېوادونه دې سپاه پاسدارن د ترهګرو په نوملړ کې شامل کړي.
د اروپايي ټولنې دوو سترو قدرتونو فرانسې او المان په دې وروستیو اونیو کې د ایران د بې پیلوټه الوتکو او توغندیو د تولید په برخه کې د ګډودۍ د رامنځته کېدو په موخه ایران ته د دوه اړخیزو توکو پر صادراتو د لا زیاتو بندیزونو د لګولو ملاتړ کړی دی.
د یادولو ده، چې تېره جمعه د اېټاليا په كاپري ښار كې د (جي ۷
) د بهرنيو چارو وزيرانو د خپلې غونډې په پاى كې اعلان وكړ، چې د ایران د بې ثباتۍ د زیاتېدو لپاره چمتو دي، چې پر تهران بندیزونه زیات کړي.
