د پاکستان د ټیلفوني خدماتو ادارې اعلان کړی، چې د ایران د ولسمشر د امنیت په موخه یې نن د ماسپښین له درېیو بجو څخه تر سبا سهار اتو بجو پورې به په کراچۍ کې ټیلفوني خدمات تړلي وي.
ابراهیم رییسي د خپل سفر په ترڅ کې کراچۍ ته رسېدلی دی.
د ایران ولسمشر ابراهیم رییسي د خپل پلاوي سره کراچۍ ته رسېدلی او هلته به د یو شمېر رسمي لیدنو تر څنګ د علي جناح مقبرې ته هم لاړ شي.
د پاکستان د مخابراتو ادارې ویلي، نن د ماسپښین له ۳ بجو څخه د سهار تر ۸ بجو پورې به د کراچۍ پر ځانګړو لارو د موبایل خدمات بند وي.
دغې ادارې ویلي، چې د كورنيو چارو وزارت د هداياتو په رڼا كې به د موبايل ټليفون خدمات بند پاتې وي او دا ګام د ايراني ولسمشر د سفر په مهال د امنيتي انتظاماتو د یقیني كولو لپاره اخیستل شوی دی.
په ورته وخت کې د کراچۍ د ټرافیکو ادارې هم اعلان کړی، چې د ښار سړکونه به سر له اوو بجو څخه تړل شوي وي.
له دې وړاندې ابراهیم رییسي د پاکستان د پنجاب ایالت له مشرې وزیرې مریم نواز شریف سره وکتل او د دواړو هېوادونو د اړیکو پر پراختیا یې خبرې وکړې.
د ایران ولسمشر لاهور ته د خپل سفر په ترڅ کې د پاکستان د مشهور فارسي او اردو شاعر اقبال لاهوري له مقبرې هم لیدنه وکړه.
ښاغلي ریيسي د غونډې پر مهال رسنيو ته وويل: "ما غوښتل چې په پاکستان کې يوې ولسي غونډې ته وينا وکړم؛ خو د ځينو دلايلو له امله دا کار ونه شو."