له ۱۶ کلونو وروسته د ایران یو ولسمشر ابراهیم رییسي له یوه لوړپوړي پلاوي سره سرېلانکا ته ولاړ. ایراني رسنیو راپور ورکړی، چې رییسي د پاکستان له درې ورځيني سفر وروسته د سرېلانکا د ولسمشر رانیل ویکرمسینګه په بلنه کولمبو ته تللی دی.
د ایران ولسمشر په دې سفر کې د سرېلانکا له ولسمشر سره یو ځای د «اوماویا» پروژه پرانیسته، چې ۲ بندونه او ۱۲۰ میګاواټه برېښنا تولیدوي.
د دې پروژې ارزښت ۵۱۴ میلیون ډالره ښودل شوې دی او د ډیزاین او جوړولو چارې یې د ایراني شرکتونو له خوا شوی دی.
د راپورونو له مخې؛ ابراهیم رییسي د دغه سفر په ترڅ کې ویلي، چې ایران له سریلانکا سره د اړیکو د پیاوړي کولو لپاره چمتو دی.
اسیایي رسنیو بیا دې هېواد ته د رییسي د سفر مهموالي ته اشاره کړې ده او ویلي یې دي، چې په ټوله سرېلانکا کې د ایراني پلاوي د سفر له امله سختې امنیتي تابیاوې نیول شوې دي.
ایران په تېرو څو کلونو کې دغه هېواد ته د پورونو په ورکولو سره د زېربناو، اوبو لګولو او د برېښنا د سکتورونو د پیاوړتیا په برخو کې پراختیایي مرستې کړې دي.
سرېلانکا د ایران له ټولو پورونو څخه تراوسه څه باندې ۱۹ میلیونه ډالره ورکړي او ټاکل شوې چې ۳۵ میلیونه ډالره نورې هم ورکړي.
د راپورونو له مخې؛ ایران د سریلانکا د چای او یو شمېر نورو صادراتي توکو اصلي پېردونکی دی.
ابراهیم رییسي د یوه پلاوي په مشرۍ د دوشنبې په ورځ د یوه درې ورځيني سفر په موخه پاکستان ته سفر کړی و.
نوموړي د دغه سفر پر مهال د پاکستان د ولسمشر او لومړي وزیر په ګډون د دې هېواد له یو شمېر نورو لوړپوړو چارواکو سره هم وکتل.
د ایراني رسنیو د راپورونو پر بنسټ؛ رییسي پاکستان ته د خپل سفر پر مهال د دواړو هېوادونو ترمنځ د سوداګریزو، کرنې او برېښنا په برخو کې د همکاریو اته تړونونه لاسلیک کړي دي.
