د تاجکستان د بهرنیو چارو وزارت خپلو وګړو ته سپارښتنه کړې، چې له ډېر ضروري کار پرته دې روسیې ته له سفر کولو ډډه وکړي. روسیې په دې وروستیو کې یو شمېر نور تاجکستاني وګړي هم د مسکو د کروکوس کنسرټ په تالار کې د برید په تړاو نیولي دي.
د روسیې د ریانووستي خبري اژانس د راپور له مخې؛ په مسکو کې د کروکوس د کنسرټ په تالار کې د برید په تړاو ۱۲ کسان نیول شوي دي.
روسیې څلور کسان د مخامخ ډزو عاملین او تاجکستاني وګړي معرفي کړي دي.
تر دې مخکې یو شمېر نور نیول شوي کسان هم تاجکستاني وګړي دي.
د تاجکستان د بهرنیو چارو وزارت په هغه اعلامیه کې چې د شنبې په ورځ خپره کړې، روسیې ته یې د خپلو وګړو د سفر د مخنیوي علت نه دی لیکلی.
په اعلامیه کې ویل شوي: "د تاجکستان وګړي دې اوسمهال روسیې ته نه ځي."
د تاجکستان د کار او کډوالۍ چارو وزارت تر دې وړاندې ویلي وو؛ د هغو تاجکستاني کارګرانو شمېر چې له روسیې څخه وځي زیات شوی دی.
