په افغانستان کې د چین سفیر د ریاست الوزرا له مرستیال سره په کتنه کې ویلي، چې د دغه هېواد د سره صلیب جمعیت په افغانستان کې د سېلابونو له زیانمنو سره د ۱۰۰ زره ډالرو مرسته کړې ده.
ژاو شینګ د دوشنبې په ورځ (د غویي ۱۰مه) په خپل اېکس کې لیکلي: "هیله ده، چې په ناورین ځپلو سیمو کې مېشت افغانان ژر تر ژره له ستونزو خلاص او عادي ژوند ته راستانه شي."
چین په داسې حال کې له افغانستان سره د یادې اندازې د مرستو خبر ورکوي، چې افغانانو سخت ژمی تېر کړی او اوسمهال هم د افغانستان په بېلابېلو سیمو کې د سختو اورښتونو او د سېلابونو د راوتلو له امله لسګونو کسانو ته مرګ ژوبله اوښتې او زرګونه جریبه ځمکې زیانمنې شوې دي.
همدا څو ورځې وړاندې د ملګرو ملتونو پراختیايي ادارې (یو اېن ډي پي) له نړۍوالې ټولنې غوښتي وو، چې په دې برخه کې د افغانانو لاسنیوي ته راودانګي چې د اقلیمي بدلون له دغو پایلو سره د مبارزې وړتیا پېدا کړي.
د دې ادارې په وینا وچکالي، سېلابونه او د ځمکې ښوییدنه هغه څه دي، چې د مېلیونونو افغانانو ژوند او روغتیا له ګواښ سره مخامخ کړی دی.
له دې سره؛ د طالبانو تر واک لاندې د هوا پوهنې ادارې د غويي میاشتې تر لسمې نېټې د افغانستان په ۱۸ ولایتونو کې د سختو بارانونو، واورو او ورسره د زورورو سېلابونو د راوتو اټکل هم کړی و.
د طالبانو تر کنټرول لاندې پېښو ته د رسېدو وزارت بیا وايي، چې په تېرو درېیو ورځو کې د افغانستان په ۱۵ ولایتونو کې د سېلابونو راوتلو او چټکو ورښتونو له امله اته تنه مړه او درې تنه ژوبل شوي دي.
د ویلو ده، چې د طالبانو تر واک لاندې ارګ هم د ژاو شینګ او سلام حنفي د کتنې په اړه د یوې خبرپاڼې په خپرولو سره ویلي، چې د چین دولت په سیاسي، اقتصادي او فرهنګي برخو کې له افغانستان سره د اړیکو د لا پراختیا غوښتونکی دی.
په خبرپاڼه کې د چین د سفیر له قوله لیکل شوي، چې چینایي سوداګر او پانګوال غواړي، چې په افغانستان کې په بېلابېلو برخو کې پانګونه وکړي.
د ریاست الوزرا اداري مرستیال په نړۍوالو ټولنو لکه د ملګرو ملتونو سازمان کې د افغانستان په اړه د چین دریځ ستایي او زیاتوي، چې افغانستان د چین د اقتصادي پروژو لکه یو کمربند یوې لارې ملاتړ کوي.
