د امریکا پولیس چارواکي وایي، چې د دوشنبې په ورځ د شمالي کارولینا د شارلوټ ښار په یوه برید کې درې پولیس افسران وژل شوي او پنځه نور ټپیان دي. پولیسو ویلي، چې یو تورن کس هم په دغې نښته کې وژل شوی دی.
دغه نښته هغه مهال پیل شوه، چې د متحده ایالاتو امنیتي ځواکونو غوښتل په ګډو عملیاتو کې یو کس د وسلو د ساتنې په تور ونیسي.
د شارلوټ_مکنبورګ د پولیسو ادارې مشر جاني جنینګ په یوې خبري ناسته کې ویلي، هغه مهال چې پولیس د تورن کس استوګنځي ته ورسېدل هغه پر پولیسو ډزې پیل کړې او په خپله هم په دغه نښته کې د خپل کور په انګړ کې ووژل شو.
هغه ویلي، چې وروسته د کور دننه هم پر پولیسو ډزې وشوې؛ خو پولیس وتوانېدل چې کور چاڼ کړي او دوه کسان چې د کور دننه وو، ونیسي.
ښاغلي جنینګ ویلي، ښایي د دغو دوو نیول شویو کسانو څخه يو یې د پوليسو پر افسرانو ډزې کړې وي.
د هغه په وینا، په پنځو ټپي شویو پولیسو کې د یو وضعیت نازک ښودل شوی.
سپینې ماڼۍ هم ویلي، چې جوبایډن له پېښې خبر شوی او په دې اړه یې د شمالي کارولینا له والي سره خبرې کړې دي.
