د برېټانیا بهرنیو چارو وزیر د مشرانو جرګې د دفاعي او نړېوالو اړیکو د کمېټې په غونډه کې وویل چې لندن پر ایران د فشار راوړلو لپاره ټول اړین ګامونه اخیستي. په ورته وخت کې، ډېویډ کامرون وویل چې سپاه پاسداران د «ترهګرو» ډلو په نوملړ کې شاملول «د مشورې وړ نه دي.»
هغه وايي کله چې دی د برېټانوي پولیسو او استخباراتي ادارو سره د سپاه پاسداران د ترهګرو په توګه پېژندلو په اړه مشوره کوي، د دوی ځواب منفي وي.
د ښاغلي کامرون په وینا، سپاه پاسداران د ترهګرو ډلو نوملړ کې شاملول به د برېټانیا او ایران ترمنځ د ډیپلوماټیکو اړیکو د پرې کېدو لامل شي.
د برېټانیې د بهرنیو چارو وزیر ټینګار وکړ، د ده لپاره مهمه ده چې د اړتیا په وخت کې د نورو اروپایي هیوادونو د منځګړیتوب پرځای تهران ته مستقیم پیغام واستوي.
د ایران له لوري پر اسراییل د توغندیو او بې پیلوټه الوتکو له برید وروسته، له برېټانیا، اروپايي ټولنې او کاناډا څخه د سپاه پاسداران د ترهګرو ډلو په نوملړ کې د شاملولو غوښتنې زیاتې شوې دي.
