د ترکیې د کورنیو چارو وزارت وایي، له اسلامي دولت داعش ډلې سره یې د اړیکو په تور ۴۱ تنه نیولي دي. د ترکیې د کورنیو چارو وزیر علي یرلیکایا نن چهارشنبه د (غويي ۱۲مه) په خپله ایکس پاڼه لیکلي چې دغه کسان یې د ترکیې په ۱۲ ولایتونو کې د چاڼیزو عملیاتو پر مهال نیولي دي.
علي یرلیکایا زیاتوي چې، لا هم په داعش ډلې پسې د دوی عملیات روان دي.
د ترکیې د کورنیو چارو وزیر وړاندې وايي، دغه چاڼیز عملیات د ترکیې له ترهګرۍ سره د مبارزې د برخې پولیسو او د دغه هیواد استخباراتو په ګډه کړي.
خو د ترکیې دغه چارواکي دا نه دي ويلي چې نیول شوي کسان خپله د ترکیې وګړي دي او که له نورو هیوادونو سره تړاو لري.
ترکیې تر هغه وروسته چې اسلامي دولت داعش ډلې په کندهار او مسکو کې د ۱۴۰۳ کال په وري میاشت کې په پرله پسې دوو ورځو کې خونړي بریدونه وکړل، په دغه هیواد کې د پلټنې عملیات ډیر کړي دي.
ایران او پاکستان هم په سیمه کې د ترهګرۍ د ډیرېدو په اړه ګډې اندېښنې سره شریکې کړې او د ترهګرۍ پر ضد یې د مخنیوي په لارو چارو خبرې کړې دي.
