د اسراییل لومړي وزیر بنیامین نتنیاهو د سه شنبې په ورځ ژمنه وکړه، چې د اوربند له هوکړې پر کېدو او نه کېدو به په رفح ځمکني بریدونه پیل کړي. د اسراییل د لومړي وزیر دفتر د هغه په حواله ویلي:« موږ به رفح ته ننوځو او هلته به د حماس کنډکونه له هوکړې پرته له منځه یوسو.»
دغه څرګندونې په داسې حال کې کېږي، چې حماس د امریکا، مصر او قطر له منځګړو سره په قاهره کې پر وړاندیز شوي اوربند غور کوي.
خو د ملګرو ملتونو سرمنشي انتونیو ګوترېشد نتنیاهو په ځواب کې ویلي، چې پر رفح پوځي برید به د نه زغملو وړ وي.
ښاغلي ګوترېش ویلي:« د امنیت شورا ټولو غړو او یوشمېر نورو حکومتونو په ښکاره ډول د دغه ډول عملیاتو سره خپل مخالفت څرګند کړی دی. زه له ټولو هغو کسانو څخه چې پر اسراییل نفوذ لري غوښتنه کوم، چې د دوی د مخنیوي لپاره اقدام وکړي.»
رفح د شاوخوا ۱.۵ مېلیونه فلسطینیانو لپاره په پناه ځای بدل شوی، چې د اسراییل د بمباریو څخه تښتېدلي دي.
له بل پلوه حماس ویلي، چې د یو څلوېښت ورځني اوربند او د فلسطیني بندیانو د تبادلې په پلان غور کوي.
د متحده ایالاتو د بهرنیو چارو وزیر انتوني بلېنکن چې له سعودي عربستان څخه اردن ته رسېدلی او نن به اسراییل ته ورسېږي، د غزې د خلکو لپاره د مرستې هڅو دوه چنده کولو غوښتنه وکړه.
د فلسطین د روغتیا وزارت په وینا، په غزه کې د اسراییل په بریدونو کې تر دې دمه لږ تر لږه ۳۴۵۳۵ کسان وژل شوي چې ډېری یې ښځې او ماشومان دي.
