د افغانستان الف کرېکټ لوبډلې سرېلانکا ته په څلورو وېکټو ماتې ورکړه
د افغان ابداليانو کرېکټ لوبډلې د سرېلانکا الف لوبډلې څخه څلورمه یو ورځنۍ لوبه په څلورو وېکټو وګټله. افغان ابدالیانو لوبډلې د درې پرله پسې ماتې خوړلو وروسته وکولای شول، چې د «ریاض حسن» د۱۰۶ منډو په جوړېدو بریا خپله کړي.
د افغانستان او سرېلانکا الف لوبډلو ترمنځ د نن یکشنبې د ورځي د څلورمې یو ورځنۍ لوبې پچه افغانستان وګټل او لومړی یې توپ اچونه غوره کړه.
سرېلانکا الف کرېکټ لوبډلې په ۵۰ اورنو کې د ۷ لوبغاړو په سوځېدو ۲۷۵ منډې هدف وټاکه.
سرېلانکايي لوبغاړو نشیان مدوشکا په ۱۲۷ توپونو ۱۱۵ او سونال دینوشا په ۷۸ توپونو ۷۸ تر نورو لوبغاړو ډېرې منډې جوړې کړې.
په افغان توپ اچوونکو کې بلال سمېع او قېس احمد هره یو درې - درې سرېلانکايي لوبغاړي وسوځول.
د افغان ابدالیانو د لوبډلې په توپوهنه کې رياض حسن په ۱۲۸ توپونو ۱۰۶، زبيد اکبري په ۸۳ توپونو ۶۸ او ننګيال خروټي په ۲۹ توپونو ۴۰ مندي جوړي کړې او دغه هدف يې په ۴۹.۴ اور کې پوره کړ.
دا لوبه د سرېلانکا په همبنټوټا ښار کې ترسره شوه.
د دې يو ورځنيو سياليو وروستۍ راتلونکې لوبه به د راتلونکې سې شنبې په ورځ په همدې لوبغالي کې ترسره شي.
