د قوش تېپې ملي شل اوریز جام کرېکټ سیالیو پر دوام، نن په ۱۷مه لوبه کې امو لوبډلې بند امیر لوبډلې ته د لسو منډو په توپیر ماتې ورکړه. د قوش تېپې په روانو سیالیو کې دا د امو لوبډلې دویم بری دی.
دغه لوبه نن سهار د باران له امله ځنډېډلې وه او وروسته بیا له ۲۰ اورونو ۱۵ اورونو ته راښکته شوه.
د دغې لوبې پچه بند امیر لوبډلې ګټلې وه او د امو زون پر وړاندې یې لومړی د توپ اچونې پرېکړه کړې وه.
د دغو لوبو پر دوام، نن د دغو سیالیو په ۱۸مه لوبه کې بیا د سپین غر لوبډله د بست لوبډلې پر وړاندې لوبېږي.
دغه لوبه د کابل پر وخت د ماسپښین په ۲:۳۰ بجو پیلېږي.
تېره ورځ بیا په قوش تېپې جام سیالیو کې د بست زون لوبډلې د بند امیر زون لوبډلې ته د ۱۸ منډو په توپیر ماتې ورکړه.
بست لوبډلې بند امیر ته له ورکړي ۲۳۸ منډو هدف په سختۍ ساتنه وکړه او لوبه یې د ۱۸ منډو په توپیر وګټله.
ورته مهال تېره ورځ د قوش تېپې شل اوره جام سیالیو کې مس عینک لوبډلې سپین غر زون ته د یوې ویکټې په توپیر ماتې ورکړه.
سپین غر لوبډلې د پچې ګټلو سره د توپوهنې پرېکړه وکړه او د شپږو لوبغاړو په سوځېدو سره په شلو اورونو کې یې ۱۳۱ منډې جوړې کړې.
