طالبانو له ایران څخه د افغانستان سېلاب ځپلو ته د مرستې غوښتنه وکړه

راضیه عالیشوندي وویل، چې مطیع الحق خالص چې د طالبانو له خوا د افغاني سرې میاشتې ټولنې د مشر په توګه ټاکل شوی، د ایران سرې میاشتې ادارې ته یې لیک استولی او د بشري مرستو غوښتنه یې کړې.

ایرنا خبري اژانس د چهارشنبې په ورځ (د غویي ۲۶مه) د ایران د سرې میاشتې ټولنې د نړۍوالو چارو او بشردوستانه حقونو د مرستیالې راضیه عالیشوندي له قوله ویلي، چې د طالبانو غوښتنه منل شوې ده.

د دې راپور له مخې؛ د ایران د سرې میاشتې ټولنې د افغانستان له سیلاب ځپلو سره د مرستې لپاره د بشردوستانه مرستو لاری چې د اوسیدو، خوراکي او روغتیايي توکي شامل دي، لېږي.

راضیه عالیشوندي افغانستان ته د دغو مرستو د نېټې په اړه جزییات نه دي وړاندې کړي.

هغه ویلي چې د اړتيا پر وخت به ايران طبي او مرستندويه ډلې د افغانستان سېلاب ځپلو سيمو ته د بشري مرستو د ترسره کولو لپاره ولېږي.

د طالبانو د مهاجرینو او راستنیدونکو چارو وزارت د یکشنبې په ورځ (د غویي ۲۶مه) وویل، چې په بغلان ولایت کې د وروستیو سیلابونو له امله ۳۱۵تنه مړه او یو زرو ۶۳۰تنه ټپیان شوي دي.