فایننشل ټایمز راپور ورکړی چې امریکا تمه لري، په راتلونکو اونیو کې پر سعودي عربستان د یرغلیزو وسلو پر خرڅلاو بندیز لرې کړي. دغې برېتانوۍ ورځپاڼې د یکشنبې په ورځ (غبرګولي شپږمه) لیکلي چې واشنګټن سعودي عربستان ته ویلي چې د دغه بندیز لرې کولو ته چمتو دی.
ځايي سرچینې وايي، د خیبرپښتونخوا خیبر ولسوالۍ د تيرا په ادم خيلو کې د ایف سي ځواکونو پر پوسته په یوه وسله وال برید کې پنځه عسکر وژل شوي او شپږ نور ټپیان دي. ویل کیږي په جګړه کې پنځه وسله وال هم وژل شوي دي.
په سیمه کې سرچینو افغانستان انټرنشنل پښتو ته وويل، چې دغه مخامخ جګړه تېره شپه د (غبرګولي شپږمه) د خیبر ولسوالۍ د تېرا په ادم خيلو کې د پاکستان پوله ساتو ځواکونو یا ایف سي پر پوسته د یوې ډلې وسله والو لخوا شوې چې په پایله کې یې د ایف سي پنځه عسکر وژل شوي او شپږ ټپیان دي.
په دغې جګړه کې تر اوسه پورې د شپږو وسله والو د وژل کېدو خبره هم کیږي.
د دغه برید مسوولیت د ټي ټي پي وسله والې ډلې منلی او ادعا یې کړې چې د پاکستان پوځ ګڼ عسکر یې وژلي او ټبیان کړي دي.
په پاکستان کې د لشکر اسلام وسله والې ډلې هم په یوه بیان کې ویلي چې له ټي ټي پي سره یې په ګډه دغه برید کړی او پاکستاني پوځ ته یې ګڼه مرګ ژوبله اړولې ده.
تر اوسه پورې پاکستاني پوځ په دې اړه څه نه دي ویلي خو د دغه پوځ د خواله رسنیو ځینو ادرسونو د جګړې خبره کړې او د مرګ ژوبلې شمېرې یې نه دي خپرې کړې.
ځینې نور نا تایید شوي خبرونه وايي، چې په دغه برید کې د پاکستان د پوځ ۱۱ عسکرو ته مرګ ژوبله اوښتې.
د خیبرپښتونخوا په خیبر دره کې اوس همد لشکر اسلام منګل باغ وسله واله ډله فعالیت کوي، دغه ډله په سیمه کې په سخت دریځۍ او ترهګرۍ پیژندل شوې ډله یادیږي.
د برتانیا لومړي وزیر ویلي، چې که محافظه کار ګوند ټاکنې وګټي، نو د ۱۸ کلونو څخه پورته عمر لرونکو ځوانانو لپاره به د «ملي خدماتو» وړاندې کول جبري کړي. ريشي سوناک وویل، چې دا پاليسي به د ټولنې په متحد کولو او د ځوانانو ترمنځ د «ګډ هدف» په موندولو کې مرسته وکړي.
محافظه کار ګوند ویلي، چې د دغه پلان له مخې به له ۱۸ کلونو پورته عمر لرونکي ځوانانو ته دوه اختیاره وړاندې شي.
ځوانان باید د وسله والو ځواکونو په لیکو کې د یو کال خدمت او په میاشت کې یو ځل د اونۍ اخري دوې ورځو کې د «رضاکاری» ترمنځ یو غوره کړي.
د دې ګوند په پلان کې راغلي، چې په رضاکاری کې به د ځایی اور وژنې څانګې سره مرسته، د خیریه موسسو سره همکاري، د یوازیتوب سره مبارزه او د زړو او جلا شویو خلکو ملاتړ شامل وي.
په ورته وخت کې د اپوزيسيون کارګر ګوند وايي، چې دا پلان به هيڅکله نتیجه ورنکړي او د محافظه کار ګوند له خوا یو بله «نه عملي کیدونکې ژمنه» ده.
د محافظه کار ګوند چارواکو اټکل کړی، چې دا پروګرام به د لسیزې په پای کې ۲.۵ ملیارد پونډه لګښت ولري.
محافظه کارانو ادعا کړې، چې د دې پلان له يو ميليارډ څخه ډېره بوديجه به د ماليې د نه ورکړې د مخنيوي پروګرام له لارې تر لاسه شي.
محافظه کاران وايي، چې د دې پلان د پلي کولو لپاره به یو شاهي کمیسیون جوړ شي، چې د پوځي او مدني ټولنې متخصصین به ورته معرفي شي او د پلان د جزیاتو په اړه به کار وکړي.
په بريتانيا کې به د روان کال د چنګاښ په څلورمه نېټه عمومي ټاکنې وشي.
د نیشاپور والي مهدي دونده وایي، چې «امام زمان» د ابراهیم رییسي د چولکې د نسکورېدې پر مهال په سیمه کې و، خو ټاکل شوې نه وه چې په معجزې سره کوم کار وکړي. امام زمان د افغانستان او ایران د مسلمانانو ترمنځ د شیعه ګانو د دولسم امام په توګه پیژندل کیږي.
د نیشاپور والي مهدي دونده د شنبې په ورځ د (غبرګولي ۵مه) د رييسي د جنازې په مراسمو کې وویل: «یو کس، چې په نیشاپور کې امام زمان ته نږدې دی، د چورلکي د غورځېدو په شپه یې هغه غایب امام د مثلث په شکل ولیدی، چې د مثلث یو اړخ د امام عصر د استوګني ځای، بل اړخ ته د چورلکي د غورځېدو سېمه او بل اړخ ته د اتم امام زيارت وو.»
نوموړي د دغه کس په حواله چې نوم یې نه دی اخیستی زیاته کړې: «کله چې د رییسي چورلکه ولوېدله، نو هغه په تشویش سره تګ راتګ کوو؛ خو په پای کې یې وویل، چې موږ په معجزو خپل کار مخ ته نه وړو.»
په داسي حال کې، چې ایران اعلان کړی و، چې د رییسي د چورلکې د هوا د خرابوالي له امله نسکوره شوې ده. خو دغه چارواکي ویلي، چې د رييسي مړينه د هيواد او هغه په ګټه وه.
هغه په دې اړه نور جزییات ورنکړل چې د رییسي په مرګ کې کومه «ګټه» وه.
د شیعه مذهبی عقیدې له مخې، د شیعه ۱۲م امام لا تر اوسه ژوندی دی مګر د ۱۴ پیړیو راهیسې غایب دی.
په همدې حال کې د ایران اسلامي جمهوري په دې باور دی، چې مشر یې د امام زمان ځای ناستی دی.
د ایران مهر خبری اژانس وایی، چې د سوډان د بهرنیو چارو وزیر حسین عواد علی او د ایران د بهرنیو چارو سرپرست وزیر علی باغی کنی د دغو دواړو هیوادونو د سفارتونو د کار له بیا پیلولو سره هوکړه وکړه .
دا هوکړه ایران ته د سوډان د بهرنیو چارو د وزیر د سفر پر مهال شوې. هغه د ابراهیم رئیسي جنازې ته د درناوي لپاره تهران ته سفر کړی و.
د ایران د بهرنیو چارو وزارت د تېر کال په نیمایي کې وویل، چې د ایران او سوډان حکومت به د دواړو هېوادونو د ګټو د تامین لپاره خپلې ډیپلوماتیکې اړیکې بیا پیل کړي.
په دغه کتنه کې د ایران او سوډان د بهرنیو چارو وزیرانو د دواړو هېوادونو د اړیکو په پراختیا ټینګار وکړ او په دواړو هېوادونو کې یې د خپلو سفارتونو بیا پرانستل د دغه اړیکو د پیاوړتیا لپاره یوه مهمه موضوع وبلله.
ایران او سوډان له اووه کلن ځنډ وروسته تېر کال د دواړو هېوادونو د اړیکو د بیا پیلولو اعلان کړی و.
د پاکستان پوځ وايي، د خیبرپښتونخوا پېښور په حسن خيلو سیمه کې د پاکستان پوځ دوه عسکر له وسله والو سره په مخامخ نښته کې وژل شوي. پوځ وايي، په دغه سیمه کې یې چاڼیز عملیات روان دي او تر اوسه پورې یې پنځه وسله وال وژلي او درې ژوبل شوي.
د پاکستان پوځ رسنیزې څانګې په خپره شوې خبرپاڼه کې ویلي چې نن سهار یکشنبه د (غبرګولي شپږمه) د دغه ایالت پېښور په حسن خيلو سیمه کې د پاکستان پوځ چانیز عملیات روان دي چې له وسله والو سره په مخامخ نښته کې یې دوه پوځيان وژل شوي او په جګړه کې یې پنځه تنه وسله وال وژلي او درې نور ټپیان دي.
تر اوسه پورې د ټي ټي پي وسله والو په دې اړه څه نه دي ويلي.
په دې وروستیو کې د خیبرپښتونخوا او بلوچستان په ډیرو سیمو کې امنيتي حالت تر پخوا ډیر ترینګلی شوی او هدفي وژنې ورځ تر بلې ډیريږي.
په دغو دواړو صوبو کې هم مهاله د پاکساني پوځ له لوري چانيز عملیات هم روان دي.