په رفح ښار کې د بې ځایه شویو کسانو په یوه پنډغالي د اسراییلي ځواکونو وروستي برید نړۍوال غبرګونونه راپارولي دي. د حماس د روغتیا وزارت د دوشنبې په ورځ اعلان وکړ، چې د تېرې یکشنبې د ورځې په برید کې ۴۵ کسان وژل شوي او ۲۴۹ نور ټپيان دي.
د اسراییل پوځ بیا د یکشنبې په ورځ وویل، چې د کره اطلاعاتو پر بنسټ یې د حماس ودانۍ په نښه کړې ده.
اسراییلي پوځ دغه راز زیاته کړې، چې په دې هوایي بریدونو کې د حماس عمومي منشي او د یادې ډلې یو بل لوړپوړی استازی وژل شوي دي.
د اروپایي اتحادیې د بهرني سیاست مسوول جوزپ بورل وایي، چې د اسراییل د بریدونو په اړه له رفح ښار څخه خپرو شویو خبرونو حیران کړی دی.
نوموړي دا بریدونه په کلکو ټکو وغندل.
د فرانسې ولسمشر امانوېل مکرون د دوشنبې په ورځ په خپل اېکس کې لیکلي، چې په رفح ښار کې د اسراییل بریدونه باید ودرول شي.
د نوموړي په خبره؛ په رفح کې د ملکي کسانو د خوندیتوب لپاره هېڅ امن ځای نه شته.
د ناروې او اسپانیا په ګډون یو شمېر نورو اروپایي هېوادونو هم دا برید غندلی دی.
د اسپانیا د بهرنیو چارو وزیر وایي: «که اسراییل پر رفح ښار د برید د درولو په اړه د نړۍوالې محکمې د حکم نقضولو ته دوام ورکړي، د دې پرېکړې پر وړاندې به د مناسب اقدام په لټه کې شي.»
د ترکیې ولسمشر رجب طیب اردوغان د دوشنبې په ورځ ژمنه وکړه، چې هېواد به یې هر کار ترسره کړي؛ څو په رفح ښار د اسراییل د بریدونو په تړاو له بنیامین نتنیاهو او د دې هېواد له نور چارواکي څخه حساب واخیستل شي.
اردوغان د اسراییل حکومت په "ترهګرۍ" تورن کړ او یادونه یې وکړه، چې دا برید تر هغه وروسته شوی، چې نړۍوالې محکمې له اسراییل غوښتي وو څو په رفح بریدونه پای ته ورسوي.
د عربي متحده اماراتو د بهرنیو چارو وزارت هم دا برید غندلی او پر رفح ښار یې د بریدونو پر بندولو ټينګار کړی دی.
دغه راز سعودي عربستان هم د رفح ښار په شمال لویدیځ کې د بې ځایه شویو په نښه کول وغانده.
قطر چې د غزې د جګړې منځګړی دی، خبرداری ورکړی چې پر رفح باندې د اسراییل برید ښایي اوربند ته د رسېدو او د یرغمل شویو تبادلې لپاره د منځګړو د هڅو خنډ شي.
تر دې وړاندې د سپینې ماڼۍ د ملي امنیت شورا یوه ویاند ټایمز اف اسراییل ته ویلي وو، چې امریکا د رفح د برید په اړه د ډېرو معلوماتو د تر لاسه کولو په هڅه کې ده.
د اسراییل پوځ د یکشنبې په ورځ اعلان وکړ، چې د غزې تړانګې په شمال کې یې د جبالیا په ښار کې د حماس یو امنیتي مرکز په نښه کړی دی.
دا خبر تر هغه وروسته خپور شو، چې حماس له شپږو میاشتو وروسته د لومړي ځل لپاره د اسراییل پر مرکزي سیمو راکټي برید وکړ او له رفح څخه یې د تل ابیب پر لور ۱۲ راکټونه وتوغول.
دا برید د بن ګوریون په هوايي ډګر کې د الوتنو د ځنډېډو لامل شو.
په دې وروستیو ورځو کې د غزې د تړانګې په سویل رفح ښار کې د اسراییل د عملیاتو د سمدستي د بندولو په اړه د نړۍوالې محکمې له حکم سره سره د اسراییل پوځ بمبارۍ ته دوام ورکړی دی.
اسراییل وايي، په رفح کې له ځمکنیو عملیاتو پرته حماس ته په بشپړه توګه ماتې ورکول ناشونې ده.
د یادولو ده، چې په غزه کې روانه جګړه د اکتوبر میاشتې په اوومه نېټه پر اسراییل د حماس له خونړۍ او بې ساري برید وروسته پیل شوې ده.
