امریکایي چارواکو ویلي، تېره ورځ د دغه هېواد په څلورو ایالتونو کې توپان او بړبوکۍ لږ تر لږه ۲۱ کسان مړه کړي دي. د راپورونو له مخې، دغه توپان په ارکانزاس، تګزاس، کنتاکي او اکلاهما ایالتونو کې سلګونه کورونه ویجاړ کړي دي.
د راپورونو پر بنسټ، د توپان او بړبوکۍ له امله اته کسان په ارکانزاس، اوه کسان په تګزاس، څلور کسان په کنتاکي او دوه کسان په اکلاهما کې مړه شوي دي.
د امریکا د هواپوهنې ملي سرویس هم د دوشنبې په ورځ په نیوجرسي، نیویارک او پنسلوانیا ایالتونو کې د تالندې برېښنا خبرداری ورکړی و.
په تګزاس کې چارواکي وایي، نږدې ۱۰۰ کسان د دغه ایالت په بړبوکیو کې ټپیان شوي دي.
همدارنګه د خرابې هوا له امله د دوشنبې په ورځ سلګونه امریکایان له برېښنا بې برخې وو.
په کنتاکي ایالت کې چارواکي وایي، چې په دغه ایالت کې د برېښنایي چارو رغول ښایي څو ورځې نور وخت ونیسي.
