د اسراییل د ملي امنیت سلاکار اعلان وکړ، چې د غزې جګړې به لږ تر لږه اووه میاشتې نور هم دوام وکړي. تساخي هانګبي وایي، چې د مصر په پوله د حایل د سیمې د درې پر څلورمې برخې کنټرول د اسراییل د پوځ په لاس کې ده؛ څو د حماس د تسلیحاتو د قاچاق مخه ونیسي.
اسراییل د چهارشنبې په ورځ خپل ټانکونه په رفح د برید په موخه ولېږل او ویې ویل، چې جګړې به یې د حماس پر وړاندې ټول کال دوام وکړي.
د اسراییل د ملي امنیت سلاکار زیاته کړه: «اسراییل چمتو نه ده څو په هغه ډول چې حماس غواړي جګړې پای ته ورسوي.»
د دې هېواد ټانکونه د رفح له هوايي عملیاتو درې اوونۍ وروسته د سې شنبې په ورځ د لومړي ځل لپاره د دغه ښار مرکز ته رسېدلي دي.
دا بریدونه له ډېرو نړۍوالو غبرګونونو سره مخ شوي وو.
د رفح اوسېدونکو رویټرز خبري اژانس ته ویلي، چې اسراییلي ټانکونه حایل سیمې ته له شاتګ مخکې د رفح او یبنه لوېدیځ د تل السلطان پر لور چې شبورې ته نږدې دی، مخکې تګ کړی دی.
په رفح کې د امبولانس د برخې مرستیال هیثم المحص بیا دغې رسنۍ ته ویلي:«د تلالسلطان له اوسېدونکو څخه یې داسې اړیکې ترلاسه کړي، چې بې پیلوټه الوتکو هغه کسان چې امن سیمو ته د تلو په حال کې په نښه کړي دي.»
له دې سره؛ د فلسطین د عامې روغتیا وزیر ویلي، چې رفح ته د مرستو رسېدو لپاره د هیڅ کومې لارې د خلاصېدو نښه نه لیدل کیږي.
اسراییل د رفح په نیولو ټینګار کوي، څو د حماس پروړاندې جګړو کې بریالی شي.
د فلسطین د عامې روغتیا وزارت په خبره، د اسراییل او حماس ترمنځ د جګړو له پیل راهیسې تراوسه لږ تر لږه ۳۶ زره او ۱۷۰ کسان وژل شوي دي.
