د طالبانو د میدان وردګو ولایت د اطلاعاتو او کلتور ریاست ویلي، چې د دغه ولایت په بهسودو ولسوالۍ کې د «رواش» په نوم مراسم ترسره شول. طالب چارواکو دغه ځایي جشن د «کلتور د ودې لپاره یو ښه فرصت» بللی دی.
دغه رياست د يوې خبرپاڼې په خپرولو سره ويلي، چې د رواش جشن د سې شنبې په ورځ (د غبرګولي اتمه) د طالب چارواکو او د دغه ولايت د يو شمېر اوسېدونکو په ګډون ترسره شو.
په ميدان وردګو کې د طالبانو د اطلاعاتو او فرهنګ رييس حبيب الله مجاهد وويل: «دا جشن په رسمي ډول د طالبانو تر واک ته رسېدو وروسته ترسره کیږي، چې يو دوديز جشن او د ځایي کلتور د ودې لپاره يو ښه فرصت دى.»
دا په داسې حال کې ده، چې طالبانو په افغانستان کې د نوروز په ګډون ځینې دودیز او لرغوني جشنونه منع کړي دي.
دا ډله نوروز د "نا مسلمانو اختر" ګڼي او حتا نوروز یې د یوه فرمان له مخې له رسمي کلیزې څخه لرې کړی دی.
