د امریکا د بهرنیو چارو وزارت ویاند په رفح کې د ولسي وګړو پر تلفاتو ژوره اندېښنه څرګنده کړه. د امریکا د بهرنیو چارو وزارت ویاند متیو مېلر د سه شنبې په ورځ (د غبرګولي په ۸مه) وویل، اسراییل باید د فلسطیني ولسي وګړو د تلفاتو د کمېدو لپاره لازم ګامونه واخلي.
مېلر وویل:« اسراییل دنده لري، چې په رفح کې د عملیاتو پر مهال هر هغه څه چې ممکن وي د ولسي وګړو د تلفاتو د کموالي لپاره دې ترسره کړي.»
هغه ورته مهال د حماس د اورپکو په اړه وویل:« حماس باید په غزه کې د ولسي وګړو ترشا له پټېدو ډډه وکړي.»
د امریکا د بهرنیو چارو وزارت ویاند زیاته کړه، واشنګټن له نږدې د اسراییل عملیات څاري؛ خو « په رفح کې د اسراییل پوځي عملیات لاتراوسه د مرکز او د غزې د شمال پرتله پراخ نه دي.»
د شنبې په ماښام پر یوه پنډغالي د اسراییل په برید کې چې له امله یې ۴۵ کسان ووژل شول، نړۍواله غوصه یې راوپاروله.
د اسراییل پوځ ویلي، چې ګومان کېږي د اسراییل له هوایي برید وروسته د مهماتو یا نورو اور اخیستونکو توکو دویمه چاودنه د فلسطینی بې ځایه شویو په پنډغالي کې د اور د خپریدو او د ملکیانو د وژل کېدو لامل شوې وي.
ورته مهال د الجزیرې خبري شبکې څو ساعته وړاندې راپور ورکړی، چې د رفح په لویدیځ المواصي سیمه کې پر فلسطیني بې څایه شویو د اسراییل په هوایي برید کې ۲۱ کسان وژل شوي او لسګونه نور ټپیان دي.
د دغه راپور پر بنسټ، د اسراییل پوځ په دغه برید کې هغه سیمه په نښه کړه چې وړاندې د بشري موخو او د فلسطینی کډوالو د اوسېدو لپاره په پام کې نیول شوې وه.
الجزیرې لیکلي، په وژل شویو کې ۱۳ ښځې هم شاملې دي.
د اسراییل پوځ دغه راپور رد کړی او ویلي یې دي، چې په المواصي کې د فلسطیني بې ځایه شویو سیمه یې نه ده په نښه کړې.
د امریکا د ملي امنیت شورا ویاند جان کربي هم د سه شنبې په ورځ د اندېښنې په څرګندولو سره ویلي، چې اسراییل به د خپلو عملیاتو د کړنلارې له امله نور هم څنډې ته شي.
