د افغانستان لپاره د روسیې ځانګړی استازی وايي، مسکو له بېجینګ سره په دغه هېواد کې د اغېز یا نفوذ پر سر سیالي نه لري. د ضمیر کابلوف په خبره، روسیه چین خپل ستراتیژیک ملګری او په افغانستان کې د غربی هېوادونو پر ځای د بېجینګ ښکېلتیا د ځان په ګټه بولي.
د تاس خبري اژانس د پنجشنبې ورځې د راپور له مخې، ښاغلي کابلوف دا خبرې د یوه تلوېزون ژوندۍ خپرونه کې کړې دي.
روسیه او چین د طالبانو له واکمنېدو مخکې هم له دې ډلې سره روابط درلودل او د دوی په واکمنېدو سره دا اړیکي نور هم پراخ شول.
چین د جمهوریت پر مهال د مس عینک کان تړون لاسلیک و، خو د طالبانو واکمنېدو سره یې د نورو کانونو تړونونه هم له له دې ډلې سره وکړل.
ضمیر کابلوف په تازه خبرو کې د مس عینک کان یادولو سره وايي: «چین د مسو په دغه ستر کان کې ځانګړې ګټې لري، چې پخواني شوروي کشف کړی و، دلته موږ له دوی سره کومه سیالي نه لرو.»
که څه هم د چین په څېر روسیه له طالبانو سره د سوداګریزو اړیکو پراخول غواړي، خو تر اوسه یې د افغانستان د طبیعي زېرمو برخه کې پانګونه نه ده کړې.
ضمیر کابلوف وايي که د دغه هېواد دولتي یا خصوصي سوداګري برخه په افغانستان کې پانګونې ته زړه ښه کړي، نو بهرنیو چارو وزارت به په دې برخه کې د خپلو ګټو لپاره مسوولیت ادا کړي.
د ضمیر کابلوف تازه څرګندونې د روسیې د ولسمشر او د بهرنیو چارو وزیر تر خبرو وروسته دي.
ولسمشر پوتین وړمه ورځ وویل، چې له طالبانو سره اړیکي جوړول اړتیا ده.
د رود روسیې د ملي امنیت شورا مرستیال مشر وايي، چې دغه هېواد پر افغانستان له واکمنو طالبانو سره پوره اړیکو جوړولو ته نږدې شوی دی.
طالبانو هم په مقابل کې ویلي چې له روسیې سره د اړیکو لپاره جدي هوډ لري.
