د استرالیا د بهرنیو چارو وزارت ویلي، چې هېواد به یې د ملګرو ملتونو په مقر کې د ابراهیم رییسي د یاد غوندې مراسمو کې ګډون ونه کړي. امریکايي چارواکو هم د واشنګټن له خوا د دې مراسمو د تحریم خبر ورکړی دی او فرانسه هم په دې مراسمو کې ګډون نه کوي.
په ملګرو ملتونو کې د فرانسې د سفیر ویاند د پنجشنبې په ورځ د ایران انټرنشنل خبریال ته ویلي، چې د دغه هېواد استازی به په ملګرو ملتونو کې د ابراهیم رییسي د درناوي په مراسمو کې ګډون ونه کړي.
رویټرز خبري اژانس د چهارشنبې په ماښام د یوه امریکايي چارواکي په حواله چې نوم او موقف یې نه دې ویل شوی ویلي، چې امریکا به په ملګرو ملتونو کې د ابراهیم رییسي د درناوي په مراسمو کې ګډون ونه کړي.
همدا راز د غویي په ۳۱مه په ملګرو ملتونو کې د امریکا د سفیر مرستیال رابرټ ووډ د ملګرو ملتونو د امنیت شورا کې د رییسي د درناوي لپاره د خپلو ۱۴ همتاو ترڅنګ ودرېد او د یوې دقیقې لپاره یې چوپتیا غوره کړه.
ابراهیم رییسي د غویي په ۳۰ مه ختیځ اذربایجان ولایت کې د هلیکوپتر د نسکورېدو وروسته ووژل شو.
ټاکل شوې ده، چې د پنجشنبې په ورځ (غبرګولي لسمه) د ملګرو ملتونو په عمومي غونډه کې د هغه د یاد غونډې مراسم ترسره شي؛ خو دغه پروګرام د بشري حقونو د فعالانو او ځینو حکومتونو له خوا د کورنیو او نړۍوالو اعتراضونو څپې راپارولي دي.
