ډیپلوماټ مجلې په یوې مقاله کې لیکلي، چې د افغانستان د یوازیني واقعیت په توګه د طالبانو معرفي کول «یو خطرناک روایت دی او نورو ناخوالو ته لمن وهلی شي.» تر دې مخکې ولادیمیر پوتین ویلي وو، چې افغانستان د طالبانو په کنټرول کې دی او روسیه باید د همدې واقعیت له مخې عمل وکړي.
د پوتین له دې ویناو وروسته، ډیپلوماټ مجلې پرون په یوه مقاله کې ولیکل، چې د افغانستان د یوازیني استازي په توګه د طالبانو معرفي کول یو بې اساسه روایت دی.
په دې مقاله کې راغلي: «دا زمونږ ګډ مسوولیت دی چې د یوه روښانه راتلونکي لپاره د افغانستان د خلکو د هڅو ملاتړ وکړو او له تېرو تېروتنو باید درس واخلو.»
په مقاله کې د دوحې دریمې ناستې ته په اشاره چېد چنګاښ په لسمه او سوولسمه جوړېږي لیکل شوې: «دا ناسته به له افغانستان سره د نړیوالې ټولنې د تعامل د زیاتېدو په موخه په منظمه توګه ترسره شي.»
ډیپلوماټ مجلې زیاته کړې ده، چې افغانستان د بشري حقونو له ناورین په تېره بیا د ښځو او نجونو او د مذهبي او قومي اقلیتونو د حقونو، امنیت او ترهګرۍ په شان له سترو ننګونو سره مخ دی.
ددې مقالې پربنسټ، د طالبانو مخالفینو په تېرو نږدې دریو کلونو کې د دې ډلې د رسمیت پیژندلو په مخنیوي کې رغنده رول درلود.
په دې مقاله کې د افغانستان د مقاومت جبهه او مدني مقاومت په ځانګړې توګه د افغان ښځو غورځنګ د هغو مخالفو ځواکونو په توګه یاد شوي، چې د طالبانو د رسمیت پيژندلو پروړاندې یې مبارزه کړې ده.
د مقالې لیکوال ټینګار کړی، چې ټولې خواوې باید د افغانستان د ناورین د ختمولو لپاره له یو بل سره خبرې او همکاري وکړي.
لیکوال په دې باور دی، چې د ناورین د پایته رسولو یوازنۍ لار د ټولګډونه حکومت جوړېدل دي.
د روسیې ولسمشر ولادیمیر پوتین د سې شنبې په ورځ په تاشکند کې د خبرو پرمهال له طالبانو سره د اړیکو درلودل یوه اړتیا وبلله، ځکه د نوموړي په خبره، د افغانستان واک اوس د طالبانو په لاس کې دی.
ولادیمیر پوتین وویل: «باید ددې واقعیت پر اساس عمل وکړو او پر همدې اساس خپلې اړیکې جوړې کړو.»
هغه زیاته کړه: «دا خلک پر افغانستان واکمن دي او د دې هېواد کنټرول د دوی په لاس کې دی.»
که څه هم پوتین د افغانستان د ستونزو یادونه وکړه، خو ددې ستونزو د جزیاتو په اړه یې څه و نه ویل.
د روسیې ولسمشر زیاته کړه: «دا چې له اوسني قدرت (طالبانو) سره څنګه اړیکه ټينګه کړو، دا بله پوښتنه ده خو په یو ډول باید ورسره اړیکې ولرو.»
نوموړي له سیمه ییزو شریکانو په ځانګړې توګه له منځنۍ اسیا سره چې له طالبانو سره څنګه اړیکې باید ولري یادونه وکړه او ویې ویل: «مونږ د خپلو ټولو ملګرو او شریکانو نظریات په پام کې نیسو او په دې اړوند به سره همغږي یو.»
