د افغانستان پخوانی ولسمشر حامد کرزی د خپل ورور قیوم کرزي په جنازه کې د ګډون لپاره امریکا ته تللی دی. سرچینې افغانستان انټرنېشنل ته ویلي، چې کرزی به د دوشنبې په ورځ د غبرګولي په ۱۴مه د خپل مشر ورور په جنازه کې ګډون وکړي.
د افغانستان انټرنشنل د خبر له مخې، ښاغلى کرزى د يکشنبې په ورځ د غبرګولي د مياشتې په ۱۳مه نېټه ويرجينيا ته ورسېد او د دوشنبې په ورځ د غبرګولي په ۱۴مه نېټه د جنازې په مراسمو کې د ګډون لپاره مريلنډ ته ولاړ.
د قیوم کرزي د جنازې مراسم به د دوشنبې په ورځ د فردوس په مقبره او د فاتحې مراسم به د مریلنډ ایالت د ترکش په جامع جومات کې ترسره شي.
د سرچينې د معلوماتو له مخې، حامد کرزى به درې ورځې د امريکا په متحدو ايالتونو کې پاتې شي او د جنازې له مراسمو وروسته به جرمني ته ستون شي.
د افغانستان پخوانی ولسمشر د غويي ۳۱مه نېټې راهسې د سترګو د درملنې لپاره په جرمني کې دی.
د حامد کرزي مشر ورور قیوم کرزی د چهارشنبې په شپه د غبرګولي ۹مه نېټه د امریکا په میریلنډ ایالت کې وفات شو.
