د فلسطین د روغتیا وزارت وایي، چې پر غزې د اسراییلي ځواکونو د بریدونو له پیل راهیسې ۱۵ زره او ۴۳۸ فلسطيني ماشومان وژل شوي دي. د دغه وزارت په راپورونو کې راغلي، چې په دغو جګړو کې بیا شاوخوا لس زره ماشومان ټپيان شوي هم دي.
د اکټوبر په اوومه د حماس له خوا د وژونکي برید په ځواب کې اسراییل پر غزې پراخ پوځي عملیات پیل کړل.
د راپورونو له مخې؛ پر غزې د اسراییل په جګړو کې تر ټولو ډېر زیان ښځو او ماشومانو ته رسېدلی دی.
د فلسطین د روغتیا وزارت په خبره؛ په دغو خونړیو بریدونو تر اوسه ١٧ زره ماشومان له خپل مور یا پلاره او یا هم له دواړو پرته ژوند کوي او ٣٥٠٠ نور ماشومان د سختې لوږې له امله د مرګ له ګواښ سره مخ دي.
د حماس د روغتیا وزارت د شمېرو له مخې؛ پر غزې د اسراییل په بریدونو کې په مجموعي توګه لږ تر لږه ۳۶۵۵۰ فلسطینیان وژل شوي دي او څه باندې ۸۲ زره نور ټپیان شوي دي.
که څه هم دا بریدونه له پراخو نړۍوالو غبرګونونو سره مخ دي؛ خو اسراییل وايي، تر څو چې حماس ډله یې په بشپړه توګه له منځه نه وي وړی، دا جګړې به دوام ولري.
له دې سره، د ملګرو ملتونو د کارپوهانو یوې ډلې هم د دوشنبې په ورځ د نړۍ له هېوادونو وغوښتل، چې په منځني ختیځ کې د سولې د ټینګښت لپاره فلسطین د یوه خپلواک هېواد په توګه په رسمیت وپېژني.
دا غوښتنه په داسې حال کې کیږي، چې په شاوخوا یوه اونۍ کې اسپانیا، ایرلنډ او ناروې د فلسطین دولت په رسمیت پېژندلی دی.
