ولادیمیر پوتین د چهارشنبې په ورځ لویدیځ ته خبرداری ورکړ، چې که د روسیې ځمکنۍ بشپړتیا له ګواښ سره مخ شي؛ نو هېواد به یې د خپل ځان د دفاع لپاره د اټومي وسلو په ګډون خپل ټول شته وسایل وکاروي.
د روسیې ولسمشر وویل، چې لویدیځ باید دا ګواښ "ساده او عادي" ونه ګڼي.
د روسیې ولسمشر دغه څرګندونې په سنټ پیټرزبورګ کې د نړۍوالو خبري اژانسونو له چارواکو سره په کتنه کې په داسې حال کې وکړې، چې د اوکراین پر سر د اټومي جګړې د ګواښ کچه لوړه شوې ده.
پوتین وویل: «د ځینو دلیلونو له مخې، لویدیځ په دې باور دی چې روسیه به هیڅکله (اټومي وسلې) ونه کاروي؛ خو موږ اټومي ډاکټران لرو، وبه ګورو چې هغوی څه وايي.»
هغه زیاته کړه: «که د چا کړنې زموږ حاکمیت او ځمکنۍ بشپړتیا له ګواښ سره مخ کړې، موږ ځان ته اجازه ورکوو چې زموږ په واک کې ټول وسایل وکاروو. دا خبره باید عادي ونه ګڼل شي.»
پوتین وویل، چې لویدیځ په وار، وار روسیه د اټومي ګواښ په تور تورنه کړې؛ خو دا یې ناسمه وبلله او یادونه یې وکړه، چې دا امریکا وه چې په دویمه نړۍواله جګړه کې یې د جاپان پر ضد اټومي وسلې وکارولې.
څارونکي په دې باور دي، له دې ګواښ سره د مسکو هدف دا دی چې د اوکراین په جګړه کې د لوېدیځ د لا زیاتې ښکېلتیا مخه ونیسي؛ خو لوېدیځو چارواکو ډېر ځله د روسیې دغه ګواښونه له پامه غورځولي او له اوکراینه یې خپل ملاتړ زیات کړی دی.
د ناټو غړو هېوادونو په دې وروستیو کې اوکراین ته اجازه ورکړه، چې د دوی وسلې د روسیې پر خاوره د برید لپاره وکاروي.
