د پهلوانۍ افغان لوبډله په نړيوالو سياليو کې د ګډون لپاره ایران ته لاړه

د طالبانو واک کې د افغانستان د المپيک، بدنې روزنې او ورزش اداره وايي، د زورخانه یي پهلوانۍ ۸ کسيزه ډله یې په ۵ ورځنیو نړيوالو سياليو کې د ګډون لپاره د ایران اصفهان ښار ته لاړه. د افغانستان د زورخانه يي پهلوانۍ ملي فدراسیون د لوبو د پيل د ورځې او مهالوېش اړوند نور څه نه دي ویلي.

په افغانستان کې زورخانه يي پهلوانۍ لوبه په رسمي ډول په ۱۳۸۵ کال کې پيل شوه، چې یو کال وروسته یې فدراسیون د نړیوال فدراسیون غړیتوب هم ترلاسه کړ.

د دې لوبې په وسایلو کې کباده، میل، تيږه، ډامبل او زورخانه يي کوډ شامل دي، چې هر یو يې ځانګړی استعمالېږي او لوبغاړي يې د تمرین پر مهال کاروي.

دغه راز د دې لوبې جامې یا لباس هم له نورو لوبو سره توپیر لري.