د فرانسې خبري اژانس نن راپور ورکړ، چې سږکال د حج د مراسمو پر مهال د مړو شویو حاجیانو شمېر یو زرو ۸۱ کسانو ته ورسېد. د راپور له مخې؛ قربانیان د لسو بېلابېلو هېوادونو وګړي دي. د یاد شمېر حاجیانو د مړینې دقیق علت تر اوسه روښانه نه دی؛ خو د تودوخې لوړه درجه یې یو لامل کېدای شي.
د یو شمېر هېوادونو د ډېپلوماټانو د شمېرو له مخې؛ د حج د سږ کال د مراسمو نیمایي قربانیان هغه حاجیان دي، چې د حج د مراسمو د ترسره کولو د اجازې له اسنادو پرته یې په دغو مراسمو کې برخه اخیستې وه.
د حج د مراسمو لپاره د سعودي عربستان د وضع شويو قوانینو له مخې؛ هر حاجی باید د مراسمو د ترسره کولو لپاره مخکې له مخکې نوم لیکنه وکړي او جواز ترلاسه کړي؛ خو هر کال په سلګونو زره کسان د جواز د تر لاسه کولو د لوړې بیې له امله هڅه کوي، په خپل سري توګه په دې مراسمو کې برخه واخلي.
هغه کسان چې له جواز پرته په دې مراسمو کې برخه اخلي، له روغتیایي، خوراکي او ځینو نورو خدمتونو بې برخې وي، چې له همدې امله د حاجیانو ترمنځ د مرګ ژوبلې کچه زیاته وي.
د ډېپلوماټيکو سرچینو په خبره؛ په دې مراسمو کې له څه باندې ۶۵۷ مړه شویو مصري حاجیانو څخه ۶۳۰ تنو یې جواز نه درلود.
له مصر وروسته اندونیزیا له هغو هېوادونو څخه دی، چې د ۱۸۰ مړه شویو حاجیانو سره تر ټولو ډېر قربانیان لري.
د ویلو ده، چې تېر کال یوازې ۳۰۰ حاجیان د حج په مراسمو کې مړه شوي وو.
اخوا د طالبانو د حج او اوقافو وزارت بیا په مکه مکرمه کې خپلو ځایونو ته د ټولو افغان حاجیانو د ستنېدو خبر ورکړ.
تر اوسه په دې مراسمو کې د هېڅ یوه افغان د مړینې خبر نه دی ورکړل شوی.
دغه وزارت ویلي، چې افغانستان ته د حاجیانو د ستنېدو بهیر ډېر ژر پیلیږي.
