د بشري حقونو څار سازمان وايي، د چین حکومت د اویغور مسلمانانو د کلتور او تاریخ د له منځه وړلو په هڅه کې د سینکیانګ په سیمه کې د زرګونو کلیو نومونه بدل کړي دي. د دغه سازمان د راپور له مخې، د ۲۰۰۹ او ۲۰۲۳ کلونو ترمنځ د سینکیانګ د ۳۶۰۰ کليو نومونه بدل شوي دي.
د بشري حقونو څار سازمان وویل چې په سینکیانګ کې چارواکو د اویغور مذهب، تاریخ یا کلتور سره تړلي نومونه لکه «سلطان» او «زیارت» یې لرې کړي او پر ځای یې د «همغږۍ» او «خوښۍ» نومونه چې د کمونسټ ګوند شعارونه دي، ایښي.
د بشري حقونو څار سازمان او په ناروې کې د اويغوري ټولنې څېړونکو د چين د احصايې ملي ادارې په ويبپاڼه کې د سینکيانګ د کليو نومونه څېړلي او د نومونو بدلون يې ليدلی دی.
د بشري حقونو د څار سازمان په وینا، داسې ښکاري چې د کلیو او ښارونو د نومونو بدلول دوام لري، د ډیرو ځایونو نومونه د ۲۰۱۷ او ۲۰۱۹ کلونو ترمنځ بدل شوي. دغه ډله ادعا کوي چې د نومونو دغه بدلون په سینکيانګ کې د اويغوریانو پر وړاندې د تاوتريخوالي له زياتېدو سره يو ځای شوی دی.
په چین کې شاوخوا شل میلیونه مسلمانان ژوند کوي. چینايي چارواکي وايي مسلمانان مذهبي ازادي لري. خو د بشري حقونو سازمانونو په چین کې پر مسلمانانو د پراخ ظلم په اړه ګڼ راپورونه خپاره کړي دي.
