د اسراییل او حزب الله ترمنځ د جګړې د پېښېدو د ګواښونو ډېرېدو پر دوام، کاناډا له لبنانه د خپلو ۴۵ زرو وګړو د تخلیې په پروګرام کار کوي. کوېټ هم له خپلو وګړو غوښتي، چې لبنان ته دې له سفر کولو ډډه وکړي او که چېرې لا له وړاندې دغه هېواد کې وي؛ نو ژر تر ژره دې دغه هېواد پرېږدي.
د اسراییل ۱۲ کانال د کاناډا او اسراییل د بهرنیو چارو وزیرانو له «ترېنګلیو» خبرو اترو خبر ورکړی او لیکلي یې دي، چې کاڼاډا په منځني ختیځ دړنښتو او په لبنان کې د جګړې له امله اندېښمنه ده.
د کاناډا د بهرنیو چارو وزیر د خپل اسراییلي سیال سره په خبرو کې له لبنانه د خپلو وګړو د تخلیې خبر ورکړی دی.
د اسراییل د بهرنیو چارو وزیر نن په اېکس پاڼه لیکلي، اجازه نه ورکوي چې حزب الله خپلو بریدونو ته دوام ورکړي او زیاته کړې یې ده:« ډېر ژر به لازمې پرېکړې وکړو.»
د حزب الله مشر حسن نصرالله د چهارشنبې په ورځ ویلي و، چې له اسراییل سره د بشپړې جګړې په لټه کې نه دی؛ خو دغه ډول جګړې ته چمتوالی لري.
هغه ټینګار کړی، چې که اسراییل پر لبنان برید وکړي؛ نو په اسراییل کې به هیڅ ځای خوندي پاتې نه شي.
