د اسراییل او حزب الله ترمنځ د جګړې د زیاتیدو د ویرې له امله، د کویت حکومت په لبنان کې له خپلو وګړو غوښتي چې ژر تر ژره له دغه هېواده ووځي. همدا راز، د کویت د بهرنیو چارو وزارت د دغه هېواد له اتباعو غوښتي چې د سیمې د امنیتي وضعیت له کبله لبنان ته سفر ونه کړي.
تر دې مخکې ځینو اسراییلي رسنیو خبر ورکړی و، چې ښايي حزب الله پر اسراییل یو ناڅاپي برید وکړي.
له بله پلوه د اسراییل د بهرنیو چارو وزیر پرون وویل، چې هېواد به یې ډیر ژر د احتمالي بریدونو د مخنیوي لپاره "اړینې پرېکړې" وکړي.
له حزب الله سره پر پوله د تاوتریخوالي زیاتیدو سره، د اسراییل پوځ د سې شنبې په ورځ پر لبنان د پراخې کچې برید لپاره عملیاتي پلانونه تصویب کړل.
د لبنان حزب الله پر اسراییل د خپلو بریدونو بندول، پر غزې د دغه هېواد د بریدونو له پای ته رسولو سره تړلي بولي.
د سرحدي تاو تریخوالي په دوام، د لبنان پر پوله د اسراییل او حزب الله ډلې ترمنځ ډزو زور اخیستی او د پراخې جګړې اندېښنې یې پارولې دي.
تر دې مخکې د ملګرو ملتونو سرمنشي انتونیو ګوترش د جمعې په ورځ د دغه تاوتریخوالي په اړه وویل چې د پولې هاخوا دښمني باید لبنان په «بله غزه» بدل نه کړي.
