د بشري حقونو څار سازمان: په سوریه کې له ۲۰۱۹ کال راهیسې داعش ډلې له ۴زرو ډېر کسان وژلي دي
په بریټانیا کې د سوریې د بشري حقونو سازمان په یو راپور کې ویلي، چې داعش ډلې له ۲۰۱۹ کال څخه را په دې خوا څلور زره او ۱۰۰ کسه په سوریه کې وژلي دي.
په بریټانیا کې د سوریې د بشري حقونو سازمان په یو راپور کې ویلي، چې داعش ډلې له ۲۰۱۹ کال څخه را په دې خوا څلور زره او ۱۰۰ کسه په سوریه کې وژلي دي.
د راپور له مخې، په وژل شویو کسانو کې ۶۲۷ تنه یې ولسي خلک او پاتې نور یې حکومتي سرتېري او د کردانو په مشرۍ کې وسلهوال کسان وو.
په دغه راپور کې چې د شنبې په ورځ خپور شو راغلي، چې داعش ډلې د ۲۰۱۹ کال په مارچ میاشت کې د «خلافت» له ړنګېدو وروسته تر اوسه پورې د کردانو تر واک لاندې نیمه خپلواکه سیمو کې دوه زره او ۵۵۰ بریدونه کړي دي.
د راپور پر بنسټ، د دغو بریدونو نیمایي قربانیان د سوریې په بادیه پراخې دښته کې چې له دمشق څخه د عراق تر پولې غځېدلې وژل شوي دي.
داعش د ۲۰۱۴ کال په جون کې د سوریې او عراق ډېره خاوره تر خپلې ولکې لاندې راوسته او د هماغه کال د جون په میاشت کې یې د «خلافت» په نوم رژیم هم اعلان کړ.
دغې ډلې د ۲۰۱۹ کال په مارچ کې د کردانو په مشرۍ د پراخه پوځي عملیاتو په ترڅ کې چې د امریکا ملاتړ هم ورسره و، خپل وروستي سنګرونه له لاسه ورکړل؛ خو بیا یې هم خپلو بریدونو ته له پتنځایونو څخه دوام ورکاوه.
د سوریې د بشري حقونو د څار سازمان په راپور کې راغلي، چې دغه هېواد کې «داسې ورځ نه ده راغلې چې بمبارۍ، هدفي وژنې او یا د جهادي ډلو بریدونه په کې نه وي شوي.»
د ملګرو ملتونو په هغه راپور کې چې د سږني کال په لومړیو کې خپور شو، راغلي چې په سوریه او عراق کې د داعش په ترکیبي ځواک کې له ۳۰۰۰ څخه تر ۵۰۰۰ پورې وسلهوال راټول شوي و، چې له بادیه دښتې څخه یې په سوریه کې د خپلو عملیاتو لپاره د تدارکاتي مرکز په توګه کار اخیست.
په سوریه کې د ۲۰۱۱ کال د جګړې له پیله تر اوسه شاوخوا نیم مېلیون وګړی وژل شوي او مېلیونونه نور بیا کډه کولو ته اړ اېستل شوي دي.
