د رای ورکولو څانګې د پنجشنبې په سهار (د چنګاښ په ۱۴مه) په ټوله بریټانیا کې پرانېستل شوې. داسې وړاندوینه کېږي، چې د دغو ټاکنو پایلې به د محافظه کارانو ۱۴ کلن حکومت پای ته ورسوي او د کارګر ګوند به واک ته راستون شي.
شاوخوا ۴۶ مېلیونه رای ورکوونکي به د پنجشنبې په سیمهییز وخت د شپې تر لسو بجو وخت ولري، چې په «عوامو جرګه» کې د ۶۵۰ تنه استازو د ټاکلو لپاره خپلې رایې وکاروي.
د ټاکنو لومړنۍ پایلې به د بریتانوي رسنیو له لارې خپرې شي او وروستۍ هغه به د جمعې په ورځ په ډاګه شي.
دغه ټاکنې داسې مهال ترسره کېږي، چې د «برګزیت» په نوم له اروپايي ټولنې څخه د بریټانیا وتلو، له کرونا څخه وروسته پرځېدلی اقتصاد، ګرانۍ او لوږې په وروستیو کلونو کې د محافظه کارانو دولت له یو لړ ننګونو سره مخامخ کړی و.
محافظهکاران دا مهال نه یوازې د بریالیتوب لپاره؛ بلکې د هغه اکثریت د مخنیوي لپاره چې تمه کېږي د کارګر ګوند به یې د بریټانیا په پارلمان کې تر ګوتو کړي هڅه کوي.
که چېرته په ناڅاپي توګه کومه پېښه رامنځته نه شي، د بریټانیا د کارګر ګوند ۶۱ کلن مشر کي یر ستارمر به د پاچا درېیم چارلز له لوري د دولت د جوړښت لپاره د جمعې په ورځ وګومارل شي.
هغه چې تر دې وړاندې د بشري حقونو وکیل و او په دې توانېدلی، چې د بریټانیا د کارګر ګوند په منځني کیڼ اړخي بدل کړي، ژمنه یې کړې چې هېواد به «د نویو هیلو او فرصتونو سره سم نوي فصل ته داخل او د ۱۴ کلنې بې نظمۍ جرړې به وباسي».
سټارمر نهه کاله وړاندې د بریټانیا سیاست ته راغلی دی.
نظر پوښتنې ښيي، چې کارګر ګوند به ۴۰ سلنه رایې خپلې کړي. دا رنګه ۲۲ سلنه رایې به محافظه کارانو، ۱۶ سلنه رایې به ملي غوښتونکو او لس سلنه نورې رایې به منځلاري ګوند لېبرال- ډیموکراټانو ته ورکړل شي.
د وروستیو ارزونو له مخې، که دغه پایلې یقیني شي د کارګر ګوند څوکۍ به له ۱۰۲ څخه ۴۳۱ ته لوړې شي، چې د کارګر ګوند لپاره له ۱۸۳۲ کال څخه راهیسې بې مخینې بریالیتوب ګڼل کېږي.
اوسنی لومړی وزیر ریشي سونک کارګر ګوند د مالیو پر لوړولو تورنوي او د یو « فوقالعاده اکثریت» د خطر له امله چې ځواکمن اپوزسیون یې په څنګ نه وي خبرداری ورکوي.
خو ستارمر بیا ژمنه کړې، چې د مالیاتو له لوړولو پرته عمومي لګښتونه به په سمه توګه مدیریت کړي.
