د افغانستان د بهرنیو چارو پخواني وزیر د ګیله من وزیر د مړینې په غبرګون ویلي: «زموږ د خلکو برحقه غږ به په تهدید، تاوتریخوالي، او ترهګرۍ غلی نه شي.» حنیف اتمر په خپل اېکس کې د پښتون ژغورنې غورځنګ او د ګیله من وزیر ملګرو ته ډاډ ورکړی، چې د دوی له برحقې مبارزې ملاتړ کوي.
نوموړي همداراز زیاته کړې ده، چې د پاکستان حکومت د خلکو او نړیوالې ټولنې په وړاندې مسوولیت لري، څو د دې جنایت په اړه وضاحت ورکړي.
ښاغلي اتمر د پاکستان له حکومته غوښتي، څو د ګیله من وزیر د وژل کېدو په اړه د یوې خپلواکې څېړنې ملاتړ وکړي.
د افغانستان د بهرنیو چارو پخوانی وزیر وایي: «د ازادۍ د لارې د دغه ګران اتل، ګیلهمن وزیر، شهادت هغه ستره قرباني ده، چې پر ازادۍ مين ولس یې د خپلو حقه غوښتنو په خاطر ورکوي.»
د پښتون ژغونې غورځنګ د مرکزي کمېټې غړی او شاعر ګیله من وزیر د روانې اونۍ د یکشنبې په شپه د یوه برید په پایله کې په سر وهل شوی و او تېره شپه یې په روغتون کې ساه ورکړه.
د پښتون ژغورنې غورځنګ مشر منظور پښتین تېره شپه ناوخته بیا په اسلام اباد کې خبریالانو ته وویل، چې ګیله من وزیر له درېیو ورځو درملنې وروسته په روغتون کې ساه ورکړه.
ګیله من وزیر په دې وروستیو کې د پاکستاني استخباراتو له خوا په بندخونه کې ورسره د شويو شکنجو په اړه د «یویشتمې پېړۍ دوزخ» په نوم کتاب چاپ ته چمتو کړی و.
نوموړي په خپله یوه مرکه کې ویلي و، چې د پاکستان په بندخونه کې ورته د پاکستاني څارګرې ادارې مامورینو ویل، چې افغانستان د دوی دوښمن دی او ګیله من د دوښمن پلوي کوي.
د ګیله من وزیر مړینه د افغانستان د مخکینیو ولسمشرانو په ګډون د حنیف اتمر، امرالله صالح، فضل محمود فضلي او لسګونو نورو پخوانیو چارواکو او د افغانستان د کرېکټ د نامتو لوبغاړو له خوا په کلکو ټکو غندل شوې ده
