د غزې ښار په شجاعیه کې تېره ورځ د اسراییل په بریدونو کې ۲۶تنه فلسطینیان وژل شوي دي. د فلسطیني چارواکو په وینا، د پنجشنبې په ورځ د اسراییل په هوايي بریدونو کې لږ تر لږه شپږ تنه په غزې ښار او ۲۰ تنه د دغه ښار په نورو برخو کې ووژل شول.
له بل پلوه د فلسطین د اسلامي جهاد یوه چارواکي د پنجشنبې په ورځ وویل، چې د سولې د خبرو نوی پړاو له کومې هوکړې پرته پای ته رسېدلی دی.
په غزه کې د روغتیایي چارواکو په وینا، له لسو میاشتو راهیسې د غزې په تړانګه د اسراییل د بمباریو له امله تر ۳۸زرو ډېر فلسطینیان وژل شوي دي.
د ملکي بېړنیو خدمتونو ادارې ویلي، چې په تېرو درېیو ورځو کې د لږ تر لږه ۳۰ فلسطینیانو جسدونه یې د غزې ښار پر سړکونو پراته لیدلي دي.
په غزه کې د اسراییل د نویو بریدونو له امله د دغه ښار اوسېدونکي په کورونو کې بند پاتې دي.
تر دې وړاندې حماس ویلي و، چې په روانه اونۍ کې پر غزې د اسراییل سخت بریدونه ښایي د جګړې د پای ته رسولو هڅې په داسې حال کې له منځه یوسي چې خبرې اترې اصلي پړاو ته نږدې شوې دي.
